Президенти Тоҷикистон Эмомалӣ Раҳмон дар ноҳияи Роштқалъа Муассисаи таҳсилоти миёнаи умумии рақами 26-ро мавриди истифода қарор доданд

Октябрь 12, 2024 14:00

ДУШАНБЕ, 12.10.2024 /АМИТ «Ховар»/. 12 октябр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар маркази ноҳияи Роштқалъа бо бардоштани парда аз рӯйи лавҳаи рамзӣ Муассисаи таҳсилоти миёнаи умумии рақами 26-ро, ки аз 4 ошёна иборат мебошад, мавриди истифода қарор доданд.

Иншооти тозабунёди соҳаи маориф дар ин ноҳияи дурдаст дорои шароити муосири илмомӯзӣ буда, барои 1280 хонанда дар ду баст пешбинӣ шудааст.

Аснои шиносоӣ ба Сарвари давлат муҳтарам Эмомалӣ Раҳмон иттилоъ доданд, ки мактаб дар масоҳати 2134 метри мураббаъ сохта шуда, дар он 31 синфхонаи таълимӣ, маҷлисгоҳ бо 300 ҷой нишаст, толори варзишӣ, ошхона ва китобхона мавҷуд аст.

Ифтитоҳи мактаби нав ва таъмини шароити хуби таҳсил идомаи иқдому ташаббусҳои ояндасози Пешвои миллат муҳтарам Эмомалӣ Раҳмон дар самти фаро гирифтани хонандагон ба низоми муосири таълим буда, оянда барои тарбияи ҷавонони донишманду худшинос мусоидат мекунад.

Корҳои сохтмонӣ дар иншооти мазкур моҳи ноябри соли 2021 аз ҷониби Муассисаи давлатии «Дирексияи иншооти ҳукуматии Дастгоҳи иҷроияи Президенти Ҷумҳурии Тоҷикистон» оғоз гардида, он дар муҳлати  беш аз 2 сол бо ҷалби 150 нафар коргарону мутахассисони маҳаллӣ бо сифати баланд ба анҷом расонида шуд.

Дар мактаб 8 синфхонаи фаннӣ мавҷуд буда, бо таҷҳизоти зарурӣ таъмин мебошанд.

Роҳбари давлат муҳтарам Эмомалӣ Раҳмон зимни суҳбат бо омӯзгорону хонандагони муассисаи навбунёд, таъкид намуданд, ки Ҳукумати кишвар барои рушди соҳаи маориф тамоми тадбирҳоро  амалӣ менамояд.

Аз ин рӯ, хонандагонро лозим аст, ки аз ин имконот самаранок истифода намуда,  дониш омӯзанд, илму техникаи муосир ва забонҳои хориҷиро аз худ намоянд.

Барои таъмини гармӣ дар бино, иншооти алоҳида бунёд шудааст, ки бо ангишт фаъолият менамояд ва тавассути он ба тамоми синфхонаҳои таълимӣ дар фасли тирамоҳу зимистон гармӣ дода мешавад.

Дар марказ ва деҳоти ноҳия ба ифтихори ҷашни бузурги миллӣ – 35-солагии Истиқлоли давлатӣ ба рушди инфрасохтори соҳаи маориф ва беҳсозии сифати таълиму тарбия таваҷҷуҳи зиёд зоҳир гардида, ҳоло корҳои лоиҳакашӣ ва сохтмонӣ дар 4 муассисаи таълимӣ идома дорад.

Аз рӯйи маълумот ҳоло дар 41 муассисаи таълимии ноҳияи Роштқалъа зиёда аз 4 ҳазор хонанда ба таҳсил фаро гирифта шудаанд.
Ифтитоҳи Муассисаи таҳсилоти миёнаи умумии №26 дар ноҳияи Роштқалъа 12.10.2024

Октябрь 12, 2024 14:00

Хабарҳои дигари ин бахш

Пешвои миллат Эмомалӣ Раҳмон бо Раиси халқ маслиҳатии Туркманистон Гурбонгулӣ Бердимуҳамедов мулоқот намуданд
Президенти Ҷумҳурии Тоҷикистон Эмомалӣ Раҳмон бо сафари корӣ вориди шаҳри Туркменбошии Туркманистон шуданд
Сафари кории Президенти Ҷумҳурии Тоҷикистон Эмомалӣ Раҳмон ба Туркманистон
35-СОЛАГИИ ИСТИҚЛОЛИ ДАВЛАТӢ. Дар шаҳри Бӯстон меҳмонхонаи «Хуҷанд» навсозӣ мегардад
ОБОДОНӢ ДАР ДЕҲОТ. Роҳи деҳаи Меҳргони ноҳияи Ҷаббор Расулов мумфарш карда мешавад
35-СОЛАГИИ ИСТИҚЛОЛИ ДАВЛАТӢ. Дар вилояти Суғд 84 корхонаю коргоҳи нав ба фаъолият шуруъ намуд
Маҷлиси Ҳукумати Ҷумҳурии Тоҷикистон баргузор шуд
НИШАСТИ МАТБУОТӢ. Донишгоҳи давлатии тиббии Хатлон ду бинои таълимӣ ва бинои хобгоҳи донишҷӯёнро ба истифода медиҳад
НИШАСТИ МАТБУОТӢ. Дар ноҳияи Данғара 6 муассисаи томактабӣ ба истифода дода мешавад
НИШАСТИ МАТБУОТӢ. Корхонаҳои хишти пухта, истеҳсоли маҳсулоти ширӣ ва парандапарварии ноҳияи Нуробод кай ба фаъолият шуруъ мекарда бошанд?
Пешвои миллат Эмомалӣ Раҳмон Вазири корҳои хориҷии Ҷумҳурии Исломии Эрон Аббоси Ароқчиро ба ҳузур пазируфтанд
НИШАСТИ МАТБУОТӢ. Бо мақсади саноатикунонии шаҳри Норак ҳашт корхонаю коргоҳи истеҳсолӣ ба истифода дода мешавад