«ҶАВОНОН-ПАЙРАВОНИ ПЕШВОИ МИЛЛАТ». Дар шаҳри Бӯстон ҳамоиши ҷавонону варзишгарон баргузор гардид

ДУШАНБЕ, 19.11.2024. /АМИТ «Ховар»/. Дар шаҳри Бӯстони вилояти Суғд таҳти унвони «Ҷавонон — пайравони Пешвои миллат» ҳамоиши ҷавонон баргузор гардид. Дар ин хусус ба АМИТ «Ховар» дар Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.

Пеш аз оғози ҳамоиш дастовардҳои ҷавонон, варзишгарон ва ҳунарҳои мардумӣ ба намоиш гузошта шуд.

Таъкид шуд, ки аз рӯзҳои аввали ба даст овардани Истиқлолияти давлатии Ҷумҳурии Тоҷикистон Ҳукумати мамлакат нисбат ба ҷавонон таваҷҷуҳи хосса зоҳир менамояд. Яке аз санадҳои меъёрию ҳуқуқие, ки дар замони соҳибистиқлолӣ — 13 марти соли 1992 ба тасвиб расид, ин Қонуни Ҷумҳурии Тоҷикистон «Дар бораи сиёсати давлатии ҷавонон» мебошад. Баъди он чандин барномаҳои дигар, ба монанди «Барномаи давлатии тарбияи ватандӯстии ҷавонони Тоҷикистон» ва «Барномаи рушди саломатии ҷавонони Тоҷикистон» қабул гардида, мавриди амал қарор дода шуданд.

Давоми 33 соли соҳибистиқлолӣ  ҷавонони мо ба дастовардҳои бузург ноил гардиданд. Ин, пеш аз ҳама, дар назди Ҳукумати Ҷумҳурии Тоҷикистон таъсис ёфтани мақомоти ваколатдори давлатии соҳа, яъне Кумитаи кор бо ҷавонон ва варзиши назди Ҳукумати Ҷумҳурии Тоҷикистон, таъсиси Стипендияи президентӣ, таъсиси Стипендияи байналмилалии «Дурахшандагон» ва Ҷоизаи ба номи Исмоили Сомонӣ барои олимони ҷавон  мебошад.

Имрӯз ҷавонони мо бояд аз ин шароити мусоид истифода бурда,  ба илмомӯзӣ машғул шаванд. Тавре Сарвари давлат борҳо зимни суханрониҳояшон иброз медоранд, “ояндаи Тоҷикистон дар дасти ҷавонон аст ва маҳз ҷавонон метавонанд бо  ҳисси баланди  ватандӯстиву ватанпарастӣ дар беҳтар гардидани ҳаёти иҷтимоии мамлакат саҳми арзанда гузоранд”.

Дар ҳамоиш ба 30 хатмкунандаи маҳфили омӯзишии «Пайравони Пешвои миллат» гувоҳнома супорида шуд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон