Гузариши «сабз» шарти асосии эҳёи иқтисодиёти Тоҷикистон ва устуворӣ ба тағйирёбии иқлим аст

ДУШАНБЕ, 09.11.2024 /АМИТ «Ховар»/. Кумитаи ҳифзи муҳити зисти назди Ҳукумати Ҷумҳурии Тоҷикистон бо мақсади мусоидат  ба татбиқи ҳадафҳои Стратегияи миллии мутобиқшавӣ ба тағйирёбии иқлими Ҷумҳурии Тоҷикистон барои давраи то соли 2030, Саҳми дар сатҳи миллӣ муайяншуда ва дигар ҳуҷҷатҳои соҳавӣ барои таҳияи «Гузориши мамлакат оид ба иқлим ва рушд» ба Намояндагии Бонки ҷаҳонӣ дар Тоҷикистон дархост манзур намудааст. Дар ин хусус АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ медиҳад.

Ҳисоботи ҷумҳурӣ оид ба мубориза бо тағйирёбии иқлим ва рушди Тоҷикистон дар соҳаи обу иқлим ба Тоҷикистон имкон медиҳад, ки ба иқтисодиёти мамлакат  неруи тоза бахшида, ҷойҳои нави кор таъсис дода шаванд. Дар баробари ин, аҳолии ҷумҳурӣ  аз хавфҳои афзоишёбандаи ҳодисаҳои ғайриодии боду ҳаво, ки тағйирёбии иқлим боиси ба вуҷуд омадани онҳо мегардад, муҳофизат мешавад.

Ҳадафи асосии ин ҳуҷҷат таҳлили таъсири тағйирёбии иқлим ва декарбонизатсияи глобалӣ ба раванди рушди Тоҷикистон буда, дар он самтҳои афзалиятнок барои эҷоди устуворӣ ба тағйирёбии иқлим ва таъмики декарбонизатсия барои беҳтар намудани натиҷаҳои рушд муайян гардидаанд.

Инчунин ин санад тавсияҳоро барои баланд бардоштани самаранокии истеҳсолот дар Ҷумҳурии Тоҷикистон, роҳҳои пешбурди технологияҳои инноватсионӣ ва эҷоди ҷойҳои кории «сабз»-ро дар баробари коҳиш додани сатҳи осебпазирӣ ба омилҳои тағйирёбии иқлим пешкаш менамояд. Гузориши ҷумҳурӣ оид ба иқлим ва рушд ба Ҳукумати Ҷумҳурии Тоҷикистон дар ҷамъоварӣ ва тавсеаи заминаи далелҳо барои муайян кардани имконияти коҳиши карбон ва рушди устувор мусоидат менамояд.

Ҳукумати Ҷумҳурии Тоҷикистон  барномаи ислоҳоти иқтисодиёти мамлакатро дар асоси гузариш ба технологияҳои «сабз» таҳия намудааст. Дар ҳисобот гуфта мешавад, ки он метавонад ба таъмини пайроҳаи устувори рушд  мусоидат намояд.

Барои ба даст овардани манфиатҳои назарраси иқтисодӣ барои мамлакат ва минтақа дар маҷмуъ, мутобиқшавӣ ба тағйирёбии иқлим ва коҳишдиҳии партовҳои гази карбон дар шабакаҳои электроэнергетикии Осиёи Марказӣ барномаи иловагии ислоҳот зарур аст. Ҷалби маблағгузории бахши хусусӣ барои муваффақияти гузариши «сабз» ва таъмини амнияти захираҳои об, озуқаворӣ ва энергетикӣ, рушди иқтисоди дорои сатҳи пасти гази карбон аҳамияти калидӣ дошта, метавонад бо истифодаи стратегияҳои муассири мубориза бо тағйирёбии иқлим ба болоравии сатҳи содирот, таъсиси ҷойҳои кор ва ҳифзи гурӯҳи осебпазири аҳолӣ мусоидат намояд.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон