Масъалаи пешбурди савдо ва таҳкими имконияти молиявӣ дар Осиёи Марказӣ дар Душанбе баррасӣ шуд

ДУШАНБЕ, 12.11.2024. /АМИТ «Ховар»/. 11 ноябр вохӯрии муовини Вазири рушди иқтисод ва савдои Ҷумҳурии Тоҷикистон Аҳлиддин Нуриддинзода бо намояндагони Корпоратсияи байналмилалии исломии маблағгузории савдо (ITFC) баргузор гардид. Мақсади мулоқот аз баррасии ҷанбаҳои муҳими ҳамкории иқтисодӣ ва мубодилаи афкор оид ба ташаббуси «Тиҷорати Осиёи Марказӣ Плюс» (TCCA+), ки ба пешбурди савдо ва таҳкими имконияти молиявӣ дар Осиёи Марказӣ нигаронида шудааст, иборат буд. Дар ин хусус ба АМИТ «Ховар» дар Вазорати рушди иқтисоди ҷумҳурӣ хабар доданд.

Аҳлиддин Нуриддинзода аҳамияти шарикӣ бо ITFC-ро таъкид намуда, иброз дошт, ки «дастгирии ин корпоратсия дар соҳаҳои маблағгузории савдо ба таҳкими иқтисодиёти Тоҷикистон ва минтақа мусоидат мекунад». Муовини Вазири рушди иқтисоди ҷумҳурӣ барои саҳми ITFC дар густариши имконоти маблағгузории исломӣ, ки барои корхонаҳои ватанӣ дурнамои нав мекушояд, изҳори миннатдорӣ намуд.

Дар ҷараёни мулоқот намояндагони ITFC маълумотро дар бораи ҷараёни татбиқи ташаббуси TCCA+ пешниҳод намуда, нақшаҳои дастгирии савдо ва содагардонии расмиёти савдоро баррасӣ карданд. Ин амал барои таҳкими низоми савдо ва баланд бардоштани иқтидори содиротии Тоҷикистон аҳамияти муҳим дорад. Ҳангоми муҳокима таваҷҷуҳи махсус ба риояи стандартҳои байналмилалӣ ва рушди неруи инсонӣ равона гардид.

Дар анҷоми мулоқот ҷонибҳо ба рушди минбаъдаи ҳамкорӣ дар доираи ташаббуси TCCA+ изҳори омодагӣ намуданд. Иброз гардид, ки Вазорати рушди иқтисод ва савдои Ҷумҳурии Тоҷикистон барои дастгирии ташаббусҳои нав, ки ба рушди иқтисоди мамлакат нигаронида шудаанд, ҳамеша омода мебошад.

АКС: Вазорати рушди иқтисод ва савдои Ҷумҳурии Тоҷикистон