Бахшида ба Рӯзи таъсиси Воҳидҳои таъйиноти махсуси Вазорати корҳои дохилӣ ҳамоиш доир шуд

Декабрь 4, 2024 17:30

ДУШАНБЕ, 04.12.2024. /АМИТ «Ховар»/. 4 декабр бахшида ба Рӯзи таъсиси Воҳидҳои таъйиноти махсуси Вазорати корҳои дохилии Ҷумҳурии Тоҷикистон (5 декабр) ҳамоиши тантанавӣ баргузор гардид. Дар ин хусус ба АМИТ «Ховар» дар Вазорати корҳои дохилии Ҷумҳурии Тоҷикистон хабар доданд.

Дар ҳамоиш корнамоиҳои кормандони Воҳидҳои таъйиноти махсуси Вазорати корҳои дохилӣ дар ҳамбастагӣ бо дигар ниҳодҳои мақомоти ҳифзи ҳуқуқ дар таҳкими суботу оромӣ ва мубориза бо ҷинояткорӣ ёдоварӣ карда шуд.

Вазири корҳои дохилӣ Рамазон Раҳимзода иброз дошт, ки «ба дӯши кормандони ин ниҳод вазифаҳои басе душвору масъулиятнок- ҳифзи марзу буми Ватан, амнияти шаҳрвандон ва мубориза бо гурӯҳҳои террористию экстремистӣ вогузор гардидааст».

Бо мақсади баланд бардоштани сатҳи дониш, маҳорати касбӣ ва омодабошии ҷангӣ дар шароити кӯҳсор марказҳои таълимии воҳидҳои таъйиноти махсус таъсис дода шуданд. Кормандони ин ниҳод дар онҳо маҳорати касбиашонро такмил медиҳанд.

Дастгирӣ ва ғамхориҳои Президенти Ҷумҳурии Тоҷикистон муҳтарам Эмомалӣ Раҳмон кормандони ин ниҳодро водор месозанд, ки уҳдадориҳои хизматиро содиқона ва софдилона иҷро намуда, ҳифзи марзу бум, дастовардҳои замони истиқлол ва амнияти сокинони мамлакатро бо сарбаландӣ таъмин намоянд.

Ҳайати шахсии ин сохтор дар набарду муборизаҳои вазнин аз мактаби шуҷоату мардонагӣ ва имтиҳону озмоишҳои сангин гузашта, ба ниҳоди боэътимоди таъминкунандаи амнияти давлат табдил ёфтааст.

Воҳидҳои таъйиноти махсус бо техникаи ҳарбӣ ва лавозимоти ҷангии муосир муҷаҳҳаз буда, кормандони он дар муассисаҳои таълимии дохил ва хориҷи мамлакат аз мутахассисони ботаҷриба таълим мегиранд.

Дар ҳамоиш як зумра кормандони Воҳидҳои таъйиноти махсуси Вазорати корҳои дохилӣ ва дигар ҷузъу томҳои он бо рутбаҳои навбатӣ, медалу нишонҳои сарисинагӣ, туҳфа ва мукофотҳои пулӣ қадрдонӣ гардиданд.

АКС: Вазорати корҳои дохилии Ҷумҳурии Тоҷикистон

Декабрь 4, 2024 17:30

Хабарҳои дигари ин бахш

Дар Душанбе ҷаласаи ҳамоҳангсози сохторҳои қудратӣ ва мақомоти ҳифзи ҳуқуқ доир гардид
Ҷаласаи комиссияи даъвати ҷумҳуриявӣ оид ба омодагӣ ба даъвати тирамоҳии хизмати ҳарбӣ доир шуд
Наҷотдиҳандагони Тоҷикистон дар тамринҳои байналмилалии ҷустуҷӯӣ ва наҷотдиҳӣ дар Британияи Кабир иштирок намуданд
Gallup: Тоҷикистон аз ҷиҳати амну субот ва эътимоду боварии шаҳрвандон ба мақомоти ҳифзи ҳуқуқ дар ҷойи якум қарор гирифт
Тоҷикистон ба даҳгонаи давлатҳои амнтарини ҷаҳон шомил шуд
Ҳайати Вазорати корҳои дохилии Тоҷикистон дар Форуми байналмилалии амнияти ҷамъиятӣ иштирок намуд
Шурои байнидавлатии ҳолатҳои фавқулода масоили бартарафсозии офатҳои табииро баррасӣ намуд
Дар Душанбе амалиёти шартии «Тасмаи бехатарӣ» ва «Скутер» оғоз шуд
Низомиёни тоҷик дар тамринҳои «Марз-2025» иштирок доранд
Ҳаракати ҳама гуна воситаҳои нақлиёт дар баъзе кӯчаҳои шаҳри Душанбе муваққатан қатъ мегардад
Дар Душанбе ҷаласаи Шурои байнидавлатӣ оид ба ҳолатҳои фавқулодаи ИДМ доир мешавад
Дар Вазорати мудофиаи Тоҷикистон вобаста ба муқовимат бо коррупсия ҳамоиш доир гардид