ФУТБОЛ. Пагоҳ «Истиқлол»-и Тоҷикистон бо «Сипоҳон»-и Эрон бозӣ мекунад

ДУШАНБЕ, 02.12.2024. /АМИТ «Ховар»/. Дастаи футболи «Истиқлол»-и Тоҷикистон бозии охирини марҳилаи гурӯҳии Лигаи чемпионҳои 2-и Осиёро дар шаҳри Душанбе ба муқобили дастаи «Сипоҳон»-и Эрон анҷом медиҳад. Дар ин хусус шореҳи варзиши АМИТ «Ховар» иттилоъ медиҳад.

Вохӯрии дастаҳо 3 декабри соли 2024 дар Варзишгоҳи марказии шаҳри Душанбе баргузор мегардад. Довари асосии бозӣ Қосим Матар Ал-Ҳатмӣ аз давлати Уммон аст. Дар канорҳои майдон ба ӯ ҳамватанонаш Носир Салим Абдуллоҳ ва Ҳомид Толиб Сайф кумак мекунанд. Довари эҳтиётӣ Яҳё Аҳмад Ал-Балушӣ низ аз Уммон мебошад.

Ҳоло дастаи футболи «Истиқлол»-и Тоҷикистон дар гурӯҳи «С» пас аз панҷ бохти пайиҳам бе имтиёз дар зинаи охир аст.

Дар ин гурӯҳ дастаи футболи «Ал-Ваҳдат»-и Урдун бо 11 имтиёз пешгом аст. Дастаи футболи «Шарҷа»-и АМА бо 10 имтиёз дар зинаи дуюм ва дастаи «Сипоҳон»-и Эрон бо 7 имтиёз дар зинаи сеюм мавқеъ гирифтаанд.

АКС: Федератсияи футболи Тоҷикистон