Дар ноҳияи Мастчоҳ масъалаи рушди соҳаи кишоварзӣ баррасӣ гардид

ДУШАНБЕ, 28.01.2025 /АМИТ «Ховар»/. 27 январ дар ноҳияи Мастчоҳ зимни машварати корӣ бо иштироки муовини Сарвазири Ҷумҳурии Тоҷикистон Сулаймон Зиёзода бо кишоварзон ва фаъолони ноҳия масъалаҳои стратегии рушди соҳаи кишоварзӣ мавриди таҳлил ва баррасӣ қарор гирифтанд.

Тавре АМИТ «Ховар» бо истинод ба Мақомоти иҷроияи ҳокимияти давлатии ноҳияи Мастчоҳ хабар медиҳад, дар ҷаласа масъалаҳои барқарорсозии хатҳои муҳофизатии байнихоҷагӣ, истифодаи усули нави кишти чигит дар зери плёнка, омодагӣ ба мавсими кишт, таъмини тухмии хушсифат ва дуруст тақсим намудани оби полезӣ ва омода намудани пойгоҳҳои обкашӣ муҳокима шуданд. Инчунин ба гардиши кишоварзӣ ворид намудани заминҳои бекорхобида, барқарор намудани хатҳои муҳофизатӣ байни хоҷагиҳо, татбиқи амалии Барномаи кабудизоркунӣ, фаъолияти гармхонаҳо, рушди парандапарварӣ ва таъмини бозорҳои дохилӣ бо маҳсулоти тару тоза мавриди баррасӣ қарор гирифт.

Муовини Сарвазири Тоҷикистон Сулаймон Зиёзода иброз дошт, ки «кишоварзӣ яке аз соҳаҳои афзалиятноки иқтисодиёти ҷумҳурӣ буда, таъмини пешрафти он тавассути банақшагирии дуруст имконпазир аст. Мо бояд майдонҳои кишти пахтаро васеъ намуда, аз тухмии хушсифат истифода барем, зеро ин метавонад ҳосилнокиро ба таври назаррас боло барад. Инчунин таъмини кишоварзон бо маводи зарурӣ, аз ҷумла нуриҳо ва техникаи кишоварзӣ бояд дар маркази таваҷҷуҳи мо бошад».

Таъкид шуд, ки шинонидани дарахтон ва сабз нигоҳ доштани муҳит на танҳо ба беҳтар шудани вазъи экологӣ, балки ба баланд бардоштани сифати зиндагии мардум мусоидат мекунад.

Заминҳои бекорхобида бояд ба гардиши кишоварзӣ ворид карда шаванд. Дар ин самт мо аз технологияҳои муосир истифода хоҳем бурд, то ин заминҳо ҳосилхез гарданд.

Гуфта шуд, ки гармхонаҳо бояд на танҳо барои таъмини бозорҳо, балки барои афзоиши содироти маҳсулоти кишоварзӣ истифода шаванд. Сифати маҳсулот барои бозори дохилӣ ва хориҷӣ бояд дар сатҳи баланд нигоҳ дошта шавад. Ҳар гармхона бояд ба истеҳсоли маҳсулоти экологӣ мусоидат кунад.

Муовини Сарвазири ҷумҳурӣ бо истинод ба дастурҳои Президенти  Тоҷикистон илова намуд, ки парандапарварӣ яке аз самтҳои муҳим барои таъмини амнияти озуқаворӣ мебошад. Таъмини тухм ва гӯшти паранда бо сифати баланд барои афзоиши ҳаҷми истеҳсолот ва қонеъ намудани талаботи аҳолӣ зарур аст.

Дар анҷоми машварат масъулин уҳдадор шуданд, ки тамоми қувва ва имкониятро ба татбиқи амалии қарорҳои қабулшуда равона намуда, дар рушди устувори соҳаи кишоварзӣ саҳм гузоранд.

АКС: Мақомоти иҷроияи ҳокимияти давлатии ноҳияи Мастчоҳ