Дар вилояти Суғд лабораторияҳо ва синфхонаҳои таълимии сохторҳои Донишгоҳи байналмилалии сайёҳӣ ва соҳибкории Тоҷикистон ифтитоҳ гардиданд

Январь 22, 2025 17:20

ДУШАНБЕ, 22.01.2025 /АМИТ «Ховар»/. Имрӯз дар Литсейи касбии хизмати шаҳри Хуҷанд ва Донишкадаи байналмилалии Хуҷанд маросими ифтитоҳи як қатор лабораторияҳо ва синфхонаҳои таълимӣ баргузор гардид. Дар ин хусус АМИТ «Ховар» бо истинод ба Донишгоҳи байналмилалии сайёҳӣ ва соҳибкории Тоҷикистон хабар медиҳад.

Лабораторияҳо ва синфхонаҳои нав бо таҷҳизоти муосир таъмин гардида, шароити замонавиро барои омӯзиши амалии донишҷӯён ва такмили малакаҳои касбии онҳо фароҳам меоранд.

Зимни ифтитоҳ ректори Донишгоҳи байналмилалии сайёҳӣ ва соҳибкории Тоҷикистон Убайдулло Асрорзода таъкид намуд, ки ҳадафи асосии ин иқдом татбиқи амалии дастуру ҳидоятҳои Пешвои муаззами миллат оид ба баланд бардоштани сатҳу сифати таҳсилоти касбӣ ва омодасозии мутахассисони баландихтисос мебошад.

Иброз гардид, ки татбиқи ин ташаббусҳо бозгӯи сиёсати хирадмандонаи Пешвои миллат дар самти таҳсилоти касбӣ ва илмомӯзӣ мебошад. Бо кушодани чунин инфрасохтори таълимӣ, Донишгоҳи байналмилалии сайёҳӣ ва соҳибкории Тоҷикистон мақсад дорад на танҳо талаботи дохилӣ, балки меъёрҳои байналмилалиро низ барои таҳсилоти касбӣ ба таври васеъ татбиқ намояд.

Бояд тазаккур дод, ки ин иқдом ба рушди як қатор соҳаҳои муҳими иқтисодию иҷтимоӣ, аз ҷумла хизматрасонӣ, соҳибкорӣ, сайёҳӣ ва дигар бахшҳои калидӣ таъсири мусбат мерасонад. Лабораторияҳои нав ба донишҷӯён имкон медиҳанд, ки дониши назариявии худро дар шароити амалӣ санҷида, дар рушди малакаҳои худ фаъол бошанд.

Лабораторияҳо ва синфхонаҳои муҷаҳҳазе, ки мавриди истифода қарор гирифтанд, инҳо мебошанд:

• Лабораторияи химия, ки бо таҷҳизоти муосири озмоишӣ таъмин буда, имконият медиҳад, ки донишҷӯён дар самти илмҳои табиатшиносӣ таҷрибаҳои амалӣ гузаронанд.
• Лабораторияи физика, ки барои омӯзиши қонуниятҳои физикӣ ва таҳқиқоти илмӣ шароити мусоид фароҳам меорад.
• Лабораторияи биология, ки барои омӯзиши сохтори организмҳои зинда ва гузаронидани таҳқиқоти биологӣ хизмат мекунад.
• Маркази тестӣ, ки барои санҷиши дониши донишҷӯён бо усулҳои муосири тестӣ ва арзёбии сифати таълим шароит фароҳам меорад.
• Синфхонаҳои таълимӣ барои омӯзиши забонҳои хитойӣ ва англисӣ, ки бо василаҳои замонавии забономӯзӣ муҷаҳҳаз гардида, ба донишҷӯён имконият медиҳад, ки малакаҳои забондонии худро дар сатҳи баланд такмил диҳанд.
• Синфхонаҳои технологияҳои иттилоотӣ, ки бо компютерҳои замонавӣ ва нармафзорҳои муосир таъмин гардида, барои омӯзиши барномасозӣ, шабакасозӣ ва дигар малакаҳои марбут ба технологияҳои рақамӣ истифода мешаванд.

Таъкид гардид, ки роҳбарияти донишгоҳ минбаъд низ барои татбиқи ҳадафҳои стратегии Пешвои миллат дар самти таҳсилоти касбӣ ва тайёр кардани мутахассисони баландихтисос талош менамояд.

АКС: Донишгоҳи байналмилалии сайёҳӣ ва соҳибкории Тоҷикистон

Январь 22, 2025 17:20

Хабарҳои дигари ин бахш

Озмуни аксҳо таҳти унвони «Душанбе – шаҳри гулҳо ва зебоӣ» эълон гардид
Хонандагони Хуҷанд ба омӯзиши нозукиҳои илми робототехника ва зеҳни сунъӣ фаро гирифта шуданд
35-СОЛАГИИ ИСТИҚЛОЛИ ДАВЛАТӢ. Дар Панҷакент иншооти нави таълимӣ ва варзишӣ ба истифода дода шуд
Имсол ба Вилояти Мухтори Кӯҳистони Бадахшон беш аз 40 ҳазор сайёҳ ворид гардид
Ректори Академияи хоҷагии халқ ва хизмати давлатии Русия бо фаъолияти Академияи идоракунии давлатии назди Президенти Ҷумҳурии Тоҷикистон шинос шуд
Сарвари давлат Эмомалӣ Раҳмон: «Шумораи сайёҳон аз Русия ба Тоҷикистон афзоиш ёфтааст»
ТОҶИКИСТОН ДАР САРХАТИ ТАШАББУСҲОИ ҶАҲОНӢ. Андешаҳо дар мавриди қабули қатъномаи таърихии Тоҷикистон оид ба зеҳни сунъӣ дар Маҷмаи Умумии СММ
УФУҚҲОИ ДӮСТӢ. Дар Тоҷикистон 71 муассисаи таҳсилоти миёнаи умумӣ бо забони русӣ фаъолият дорад
Дар муассисаҳои олии Тоҷикистон 244 шаҳрванди Федератсияи Русия таҳсил доранд
Федератсияи Русия ба муассисаҳои таълимии Тоҷикистон 800 ҳазор нусха китобҳои дарсии забони русӣ мефиристад
28 ҳазор шаҳрвандони Тоҷикистон дар муассисаҳои олии Федератсияи Русия таҳсил доранд
«ФУРӮҒИ СУБҲИ ДОНОӢ КИТОБ АСТ». 434 довталаб ба даври чоруми озмун роҳхат гирифт