Дастаҳои «Вавилон» ва «Рахш-такси» ғолиби мусобиқаи футзал ба поси хотири Александр Кирсанов шуданд

ДУШАНБЕ, 24.01.2025 /АМИТ «Ховар»/. Дар шаҳри Душанбе мусобиқаи анъанавии футзал, ки ба поси хотири собиқ бозингари маъруфи дастаҳои «Помир», «Вахш» ва «Ирригатор» Александр Кирсанов бахшида шуд, ба охир расид. Дар ин хусус АМИТ «Ховар» бо истинод ба Федератсияи футболи Тоҷикистон хабар медиҳад.

Мусобиқа байни ҳаваскорон ва собиқадорон дар маҷмааи варзишии Кумитаи андози Ҷумҳурии Тоҷикистон, воқеъ дар шаҳри Душанбе баргузор гардид.

Дастаи «Рахш-Такси» байни ҳаваскорон дар финал бар дастаи «Соро компания-2» бо ҳисоби 2:1 ғолиб омад. Дар вохӯрӣ барои ҷойи сеюм футзалбозони «Динамо» (ВКД) тими Шабакаҳои барқро мағлуб карданд (13:4).

Байни собиқадорон дастаи «Вавилон» дар вохӯрии финалӣ бар тими «Динамо» (ВКД) бо ҳисоби 8:2 ғалаба карда, соҳиби ҷом гардид. Медалҳои биринҷии мусобиқа насиби собиқадорони дастаи «Равшан»-и Кӯлоб шуд, ки аз тими «Лазиз» (7:3) пурқувваттар баромаданд.

Дар мусобиқаи ҳаваскорон беҳтарин ҳамлагар Наврӯз Саидов («Соро компания-2») дониста шуд. Ҷоизаи беҳтарин нишонзан ба Умед Кузиев («Динамо» ВКД) дода шуд. Самад Шарифов («Рахш-Такси») беҳтарин бозингар эълон гардид.

Дар мусобиқаи собиқадорон ҷоизаи нишонзани беҳтарин насиби Бахтиёр Азизов («Равшан») гардид. Беҳтарин ҳамлагар Алишер Улмасов («Вавилон») ва беҳтарин бозингари мусобиқа Хуршед Маҳмудов («Вавилон») дониста шуданд.

АКС: Федератсияи футболи Тоҷикистон