Лоиҳаи «Методика ва саволномаи таҳқиқоти маҷмуии сотсиологӣ оид ба дарки ҷомеа дар бораи коррупсия» мавриди муҳокима қарор гирифт

ДУШАНБЕ, 08.01.2025. /АМИТ «Ховар»/. 6 январ дар Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз ҷониби гурӯҳи корӣ лоиҳаи «Методика ва саволномаи таҳқиқоти маҷмуии сотсиологӣ оид ба дарки ҷомеа дар бораи коррупсия» мавриди муҳокима қарор гирифт.

Тавре АМИТ «Ховар» бо истинод ба Агентии назорати давлатии молиявӣ ва мубориза бо коррупсия хабар медиҳад, дар муҳокимаи лоиҳа масъулини вазорату идораҳои дахлдори ҷумҳурӣ ва намояндагони ҷомеаи шаҳрвандӣ иштирок намуданд.

Таъкид гардид, ки яке аз роҳҳои асосии баҳодиҳӣ ба сатҳи коррупсия дар соҳаҳои муайян баргузор намудани таҳқиқоти маҷмуии сотсиологӣ мебошад. Зеро муайян намудани ҳолати воқеии мавҷудияти коррупсия дар ин ё он соҳа имконият медиҳад, ки роҳҳои нав ва самарабахши муқовимат ба коррупсия коркард ва амалӣ карда шаванд.

Бо ин мақсад коршиносон фикру андешаҳои худро доир ба лоиҳаи «Методика ва саволномаи таҳқиқоти маҷмуии сотсиологӣ оид ба дарки ҷомеа дар бораи коррупсия» баён намуданд.

АКС: Агентии назорати давлатии молиявӣ ва мубориза бо коррупсияи Ҷумҳурии Тоҷикистон