Ҳукумати Тоҷикистон бо мақсади таъмини истиқлолияти энергетикӣ 18 лоиҳаи сармоягузориро амалӣ намуд

Январь 18, 2025 09:53

ДУШАНБЕ, 18.01.2025 /АМИТ «Ховар»/. Соли 2024 Ҳукумати Тоҷикистон бо мақсади татбиқи яке аз ҳадафҳои стратегӣ — таъмини истиқлолияти энергетикӣ корҳоро дар доираи 18 лоиҳаи сармоягузории давлатӣ барои бунёд ва таҷдиди неругоҳҳои барқӣ, кам намудани талафоти неруи барқ ва ҷорӣ намудани низоми биллингии он, электрофикатсияи деҳот, бунёди хатҳои интиқол ва тақсимоти барқ ва солимгардонии вазъи молиявии соҳа ба маблағи умумии 1,7 миллиард доллар амалӣ намуд. Ин лоиҳаҳои энергетикӣ бо мақсади таъмини устувории низоми энергетикии мамлакат ва истифодаи самараноки манбаъҳои барқароршавандаи неруи барқ татбиқ шудаанд. Ин нукта дар маҷлиси васеи Ҳукумати Ҷумҳурии Тоҷикистон, ки 17 январ таҳти раёсати Президенти Ҷумҳурии Тоҷикистон, Пешвои миллат, Раиси Ҳукумати мамлакат муҳтарам Эмомалӣ Раҳмон баргузор шуд, баён гардид.

Тавре Президенти Ҷумҳурии Тоҷикистон муҳтарам Эмомалӣ Раҳмон дар Паём ба Маҷлиси Олӣ таъкид намуданд, «Ҳукумати мамлакат бо мақсади расидан ба истиқлоли энергетикӣ ва дар ин замина таъмин намудани рушди устувори иқтисоди миллӣ бо истифода аз ҳама имконияту сарчашмаҳои мавҷуда, хусусан манбаъҳои рушди энергияи «сабз» мунтазам чораҷӯйӣ менамояд. Ҳоло корҳои таҷдиду навсозӣ дар неругоҳҳои барқи обии «Норак» ва «Қайроққум» ба маблағи умумии 6 миллиарду 900 миллион сомонӣ ва сохтмони неругоҳи «Себзор» ба маблағи 700 миллион сомонӣ идома доранд.

Иттилоъ дода шуд, ки то имрӯз ду агрегати неругоҳи «Норак» ва се агрегати неругоҳи «Қайроққум» пурра навсозӣ карда шуд. Соли 2025 бо таҷдиду навсозии боз се агрегати дигар дар неругоҳи «Қайроққум» иқтидори он иловатан 24 мегаватт зиёд гардида, ба 174 мегаватт мерасад. Инчунин як агрегати дигар дар неругоҳи «Норак» таҷдид шуда, иқтидори он 40 мегаватт зиёд мегардад ва сохтмони неругоҳи «Себзор» бо тавоноии 11 мегаватт ба анҷом расонида мешавад. Яъне, иқтидори мавҷудаи энергетикии Тоҷикистон дар соли 2025 танҳо аз ин ҳисоб 180 мегаватт зиёд мегардад.

Дар баробари ин, соли 2025 дар вилояти Суғд сохтмони неругоҳи барқи офтобӣ бо иқтидори 200 мегаватт оғоз мегардад. Имрӯзҳо бунёди Неругоҳи барқи обии «Роғун» бо суръати баланд идома дошта, дар ду соли охир бо ин мақсад аз ҳисоби буҷети давлатӣ беш аз 9 миллиард сомонӣ харҷ гардидааст. То имрӯз беш аз 50 фоизи корҳои сохтмони неругоҳи «Роғун» ба анҷом расонида шудаанд. Ҳукумати мамлакат бо истифода аз ҳама сарчашмаҳо барои сари вақт маблағгузорӣ намудани сохтмони ин иншооти стратегӣ мунтазам чораҷӯйӣ мекунад. Аз моҳи майи соли 2027 аз ҳисоби истеҳсоли неруи барқ дар «Роғун» ва силсиланеругоҳҳои дарёи Вахш норасоии неруи барқ дар мамлакат пурра бартараф ва Тоҷикистон ба истиқлоли комили энергетикӣ ноил мегардад».

АКС: Хадамоти матбуоти Президенти Ҷумҳурии Тоҷикистон

Январь 18, 2025 09:53

Хабарҳои дигари ин бахш

Лоиҳаҳои Фонди байналмилалии рушди кишоварзӣ баррасӣ гардиданд
ПЕШСАФИ ПАХТАЧИНӢ. Дар Мастчоҳ зиёда аз 7 ҳазор тонна пахта ҷамъоварӣ карда шудааст
Лоиҳаҳои сохтмони НБО-и «Роғун» ва таҷдиди НБО-и «Норак» бо ҳайати Бонки ҷаҳонӣ баррасӣ гардид
Вазири нақлиёти Тоҷикистон дар Сеул аз татбиқи тарҳҳои гуногун дар соҳаи нақлиёт бо Корея ёдовар шуд
Форуми тиҷоратии Тоҷикистон ва Швейтсария баргузор гардид
Ҷаласаи махсуси ҳамоҳангсозии гурӯҳи ИКАО оид ба такмили хатҳои ҳавоии минтақаи шарқ – «RDGE – SСМ/2025» доир шуд
ҲИСОБАРОБАРКУНИИ ҒАЙРИНАҚДӢ. Байни «Амонатбонк» ва Агентии суғуртаи иҷтимоӣ ва нафақа санади ҳамкорӣ ба имзо расид
Парвозҳои мустақим дар масири Сиан-Душанбе-Сиан оғоз гардиданд
Дар Душанбе конфронси байналмилалӣ оид ба роҳнамои стратегии рушди иқтисоди миллӣ доир мегардад
Ҷаласаи Гурӯҳи коршиносони миллӣ барои омодагӣ ба даври сеюми баҳодиҳии мутақобили низоми муайян доир шуд
Тақвияти ҳамкории Тоҷикистон ва Чин дар соҳаҳои технологияҳои иттилоотию рақамӣ баррасӣ гардид
ИСТИФОДАИ САМАРАНОКИ ЗАМИН. Фаъолияти Абдурауф Зиёев дар шаҳри Панҷакент барои ҳамдеҳагонаш намунаи ибрат аст