НИШАСТИ МАТБУОТӢ. Соли 2024 нархи маҳсулоти хӯрокворӣ чӣ қадар баланд гардид?

ДУШАНБЕ, 12.02.2025. /АМИТ «Ховар»/. Дар ҳаҷми умумии фурӯши молҳои хӯрокворӣ таносуби бештар аз рӯи арзиш ба гӯшт ва маҳсулоти гӯштӣ 15,5 фоиз, нон ва маҳсулоти нонӣ 17,0 фоиз, қанду шакар ва маҳсулоти қаннодӣ 4,5 фоиз, сабзавот ва картошка 5,4 фоиз ва равғани растанӣ 4,3 фоиз афзалият дорад. Дар ин хусус директори Агентии омори назди Президенти Ҷумҳурии Тоҷикистон Ҷамшед Нурмаҳмадзода имрӯз зимни нишасти матбуотӣ иттилоъ дод.

Гуфта шуд, ки аз аввали соли 2024 нархи маҳсулоти хӯрокворӣ 3,0 фоиз қимат шудааст, ки асосан аз ҳисоби болоравии нархи маҳсулоти гӯштӣ – 16,6 фоиз (гӯшти гов – 28,5 фоиз, гӯшти гӯсфанд – 19,9 фоиз ва гӯшти моҳӣ – 2,8 фоиз); равған ва чарбу – 15,8 фоиз (равғани офтобпараст – 11,5 фоиз ва равғани пахта – 10,7 фоиз); нӯшокиҳои спиртдор – 10,4 фоиз, шир ва маҳсулоти ширӣ – 9,7 фоиз ва тамоку – 5,8 фоиз ба амал омадааст.

Инчунин зимни нишасти матбуотӣ иттилоъ дода шуд, ки дар давраи ҳисоботӣ нархи маҳсулоти нонӣ ва ярмаҳо – 1,2 фоиз, нӯшокиҳои беспирт – 3,5 фоиз, шакар – 9,5 фоиз ва мевагиҳо 9,7 фоиз арзон шудааст.

Фирӯза ДАВЛАТЗОДА,
АМИТ «Ховар»

АКС: АМИТ «Ховар»