Ҷаласаи шашуми Кумитаи муштараки ҳамоҳангсозӣ доир ба «Лоиҳаи рушди иқтидор оид ба татбиқи самтҳои навигатсионӣ дар Тоҷикистон» баргузор шуд

ДУШАНБЕ, 28.03.2025 /АМИТ «Ховар»/. Дар шаҳри Душанбе ҷаласаи шашуми Кумитаи муштараки ҳамоҳангсозӣ доир ба «Лоиҳаи рушди иқтидор оид ба татбиқи самтҳои навигатсионӣ дар Тоҷикистон» баргузор гардид, иттилоъ медиҳад АМИТ «Ховар» бо истинод ба Корхонаи воҳиди давлатии «Тоҷикаэронавигатсия».

Дар ҷаласа намояндагони Агентии авиатсияи граждании назди Ҳукумати Ҷумҳурии Тоҷикистон, директори генералии Корхонаи воҳиди давлатии «Тоҷикаэронавигатсия» Лоиқ Бегиҷонзода, роҳбари Агентии Ҷопон оид ба ҳамкории байналмилалӣ (JICA) дар Тоҷикистон Имай Сейҷу, мутахассисони JICA ва дигар масъулин сухан намуданд.

Иброз гардид, ки татбиқи муваффақонаи «Лоиҳа оид ба рушди иқтидор барои татбиқи намудани навигатсия дар асоси хусусият (PBN) дар Ҷумҳурии Тоҷикистон» дар ҳамкорӣ бо JICA ва гурӯҳи мушовирони Ассотсиатсияи байналмилалии нақлиёти ҳавоӣ (IATA), ширкатҳои ҳавопаймоӣ ва корхонаҳои авиатсионӣ амалӣ гардид.

Ин дастоварди назаррас дар таъмини бехатарии парвозҳо ва истифодаи самараноки ҳарими ҳавоии Ҷумҳурии Тоҷикистон мебошад. Татбиқи ин лоиҳа ба баланд бардоштани иқтидори хизматрасонии ҳаракати ҳавоии корхона ва мубодилаи таҷриба бо мутахассисони хориҷӣ мусоидат намуд.

Ҳамзамон мутахассисон таъкид намуданд, ки амалӣ гардидани лоиҳа ба такмили танзими фазои ҳавоӣ, рушди дастрасии минтақавӣ ва ҳамгироӣ дар пешниҳоди хизматрасонии аэронавигатсионӣ, беҳтар намудани сатҳи бехатарии парвозҳо ва сифати хизматрасонии аэронавигатсионӣ равона гардидааст.

Таъкид шуд, ки бо мақсади мутобиқ намудани сатҳу сафати хизматрасонии аэронавигатсионӣ ба меъёрҳои Ташкилоти байналмилалии авиатсияи гражданӣ (ICAO) Корхонаи воҳиди давлатии «Тоҷикаэронавигатсия» дар ҳамкорӣ бо JICA ин лоиҳаро амалӣ намуд.

АКС: «Тоҷикаэронавигатсия»