Ҷаласаи Гурӯҳи кории SPECA оид ба содагардонии расмиёти савдо доир гардид

ДУШАНБЕ, 17.03.2025 /АМИТ «Ховар»/. 14 март дар шаҳри Ашқободи Туркманистон ҷаласаи бистуми Гурӯҳи кории Барномаи махсуси Созмони Милали Муттаҳид барои иқтисоди кишварҳои Осиёи Марказӣ (SPECA) оид ба содагардонии расмиёти савдо баргузор гардид. Онро муовини Вазири рушди иқтисод ва савдои Ҷумҳурии Тоҷикистон Аҳлиддин Нуриддинзода ба тариқи маҷозӣ раисӣ намуд. Дар ин хусус ба АМИТ «Ховар» аз Вазорати рушди иқтисод ва савдои ҷумҳурӣ хабар доданд.

Ҷаласа бо ташаббуси Комиссияи иқтисодии Созмони Милали Муттаҳид барои Аврупо (UNECE) ва Комиссияи иқтисодӣ ва иҷтимоии Созмони Милали Муттаҳид барои Осиё ва Уқёнуси Ором (ESCAP) доир шуда, дар он ҳайатҳои расмӣ аз давлатҳои аъзои СПЕКА, созмонҳои байналмилалӣ ва шарикони рушд иштирок намуданд.

Дар ҷаласа Аҳлиддин Нуриддинзода иброз намуд, ки таҳти роҳбарии Президенти Ҷумҳурии Тоҷикистон муҳтарам Эмомалӣ Раҳмон мамлакати мо талош дорад, ки ҳамкории минтақавиро таҳким бахшида, раванди савдо ва иқтисоди рақамиро ба сатҳи нав барорад. Тоҷикистон ҳамчун давлати пешсаф дар таҳияи механизмҳои муосири тиҷоратӣ ва татбиқи технологияҳои рақамӣ на танҳо ба рушди иқтисоди худ мусоидат менамояд, балки дар ҳалли мушкилоти умумиминтақавӣ низ нақши калидӣ мегузорад.

Дар ҷаласа масъалаҳои калидии ҳамкории кишварҳои SPECA дар раванди узвият ва иштироки фаъол дар Созмони Умумиҷаҳонии Савдо (СУС), пешрафт дар татбиқи Стратегияи SPECA оид ба содагардонии расмиёти савдо, амалӣ гардонидани Принсипҳои тиҷорати устувор, бартарафсозии монеаҳои ғайритарифӣ ва густариши рақамикунонии савдо мавриди баррасӣ қарор гирифтанд.

Намояндагони давлатҳои аъзои SPECA раванди татбиқи Стратегияи SPECA оид ба содагардонии расмиёти савдо ва Харитаи роҳи онро муҳокима намуда, ҳамзамон дурнамои ҳамкории иқтисодии минтақаро муайян карданд. Ҳамкории кишварҳои СПЕКА дар раванди узвият ва татбиқи Созишномаи содагардонии расмиёти савдои Созмони Умумиҷаҳонии Савдо яке аз бахшҳои муҳими ҷаласа буд.

Таҳлили монеаҳои ғайритарифӣ ва роҳҳои содагардонии расмиёти тиҷоратӣ дар шароити тағйирёбии муҳити ҷаҳонӣ низ мавриди муҳокима қарор гирифт. Бо назардошти мушкилоти мавҷуда Тоҷикистон пешниҳод намуд, ки дар доираи SPECA механизмҳои муассири бартарафсозии монеаҳои ғайритарифӣ ва мутобиқсозии низоми савдо бо стандартҳои байналмилалӣ таҳия ва татбиқ карда шаванд.

Дар идомаи ҷаласаи бистуми Гурӯҳи кории Барномаи махсуси Созмони Милали Муттаҳид барои иқтисоди кишварҳои Осиёи Марказӣ (SPECA) оид ба содагардонии расмиёти савдо намояндагони кишварҳои аъзои SPECA ва шарикони рушд нақшаҳои ояндаи ҳамкориро тасдиқ намуда, барои идомаи чорабиниҳои муштарак изҳори омодагӣ намуданд.

Иттилоъ дода шуд, ки натиҷаҳои ин ҷаласа асоси нави рушди ҳамкории тиҷоратӣ ва ҳамгироии рақамӣ дар минтақаи SPECA-ро гузошта, Тоҷикистон омода аст дар самти пешбурди ин ташаббусҳо нақши пешбарандаашро боз ҳам тақвият диҳад.

АКС: Вазорати рушди иқтисод ва савдои Ҷумҳурии Тоҷикистон