Котиби Шурои амнияти Ҷумҳурии Тоҷикистон бо Котиби генералии Созмони ҳамкории Шанхай мулоқот намуд

ДУШАНБЕ, 14.03.2025. /АМИТ «Ховар»/. 14 март мулоқоти Котиби Шурои амнияти Ҷумҳурии Тоҷикистон Юсуф Раҳмон бо Котиби генералии Созмони ҳамкории Шанхай Нурлан Ермекбоев доир гардид, хабар медиҳад АМИТ «Ховар».

Зимни мулоқот масоили марбут ба таъмини амнияту бехатарӣ, мубориза бо терроризму ҷиноятҳои муташаккили фаромилӣ, радикализм ва дигар зуҳуроти номатлуби минтақа ва ҷаҳон мавриди баррасӣ қарор дода шуд.

Таъкид гардид, ки Тоҷикистон дар доираи Созмони ҳамкории Шанхай ва дигар ташкилоту созмонҳои минтақавию байналмилалӣ дар мубориза бо терроризму экстремизм, ҷиноятҳои муташаккили фаромилию киберӣ, гардиши ғайриқонунии маводи нашъаовар ва дигар зуҳроти номатлубу хатарбор нақши фаъолу назаррас дошта, дар ин самт пайваста ташаббускору пешоҳанг мебошад.

Мусоҳибон изҳори боварӣ намуданд, ки татбиқи самараноки «Барномаи ҳамкорӣ дар мубориза бар зидди терроризму ифротгароӣ ва ҷудоихоҳӣ барои солҳои 2025-2027» дар оянда ба таъмини амнияту бехатарӣ дар қаламрави кишварҳои аъзои созмон мусоидат менамояд.