Ҳайати Тоҷикистон дар Шоҳигарии Баҳрайн таҳкими ҳамкории молиявию бонкиро баррасӣ намуд

Апрель 25, 2025 13:00

ДУШАНБЕ, 25.04.2025 /АМИТ «Ховар»/. Муовини якуми Раиси Бонки миллии Тоҷикистон Фируз Шарифзода  дар Шоҳигарии Баҳрайн бо як зумра  роҳбарони муассисаҳои молиявӣ ва мақомоти танзимкунандаи кишварҳои араб вохӯрӣ анҷом дод, ки зимни он  масъалаҳои муҳими марбут ба таҳкими ҳамкории байнибонкӣ баррасӣ шуданд, иттилоъ медиҳад АМИТ «Ховар» бо истинод ба Бонки миллии Тоҷикистон.

Фирдавс Шарифзода     аз ҷумла бо раиси Шурои парасторони Ташкилоти баҳисобгирии муҳосибӣ ва аудит барои ташкилоти қарзии исломӣ (AAOIFI) Шайх Иброҳим бин Халифа Оли Халифа мулоқот намуд. Зимнан  роҳҳои густариши ҳамкории стратегӣ ва татбиқи стандартҳои байналмилалии муҳосибӣ ва аудити исломӣ бо мақсади баланд бардоштани иқтидори касбии кормандони низоми бонкии Тоҷикистон, инчунин масоили таҳкими робитаҳои институтсионалӣ, такмили санадҳои меъёрӣ дар самти сиёсати пулӣ барои муассисаҳои молияи исломӣ ва рушди низоми такофул баррасӣ карда шуд.

Инчунин муовини якуми  Раиси Бонки  миллии Тоҷикистон бо   директори генералии Донишкадаи бонкӣ ва молияи Баҳрайн (BIBF)  доктор Аҳмад Аш-Шайх вохӯрда, масъалаҳои таҳкими иқтидори кадрӣ, рушди молияи исломӣ ва рақамисозии низоми бонкиро муҳокима намуданд. Ҷонибҳо ҳамзамон вобаста ба зарурати ташкили даврҳои таълимии фарогир ва таҳияи барномаҳои махсуси омӯзишӣ ибрози назар намуданд.

Дар анҷоми мулоқот байни Бонки миллии Тоҷикистон ва BIBF Пайнавишти ҳусни тафоҳум ба имзо расонида шуд, ки он барои ҳамкории минбаъда дар соҳаҳои молияи рақамӣ, бонкдории исломӣ ва таҳияи стандартҳои касбӣ замина фароҳам меорад. Дар доираи сафари корӣ инчунин бо роҳбарияти Бонки марказии Баҳрайн масъалаҳои марбут ба танзиму назорат, мутобиқсозии заминаҳои ҳуқуқӣ ва кушодани ҳисобҳои муросилотӣ муҳокима гардиданд. Дар ин замина зарурати истифодаи таҷрибаи байналмилалӣ дар низоми молиявии Ҷумҳурии Тоҷикистон таъкид гардида, ҷониби Баҳрайн барои мусоидат дар таҳияи санадҳои меъёрии мутобиқ ба стандартҳои бонкдории исломӣ изҳори омодагӣ намуд.

Инчунин дар вохӯрии муовини якуми раиси Бонки миллии Тоҷикистон Фируз Шарифзода бо директори иҷроияи гурӯҳи «Al Ahli United Bank» ва узви Шурои «Kuwait Financial House» Шади Заҳрон ҷонибҳо доир ба рушди ҳамкории молиявӣ, ҷалби сармоягузорӣ, бонкдории исломӣ, кушодани филиал ва намояндагиҳо, ифтитоҳи ҳисобҳои муросилотӣ мубодилаи афкор намуда, татбиқи таҷрибаҳои муосир, тақвияти ҳамкорӣ бо бонкҳои байналмилалӣ ва ба ин васила табодули таҷриба дар самти молияи исломиро мувофиқи мақсад арзёбӣ намуданд.

           АКС: Бонки миллии Тоҷикистон

Апрель 25, 2025 13:00

Хабарҳои дигари ин бахш

Ҷаласаи Гурӯҳи корӣ оид ба мониторинг ва арзёбии ҳуҷҷатҳои банақшагирии стратегӣ дар соли 2025 доир шуд
Имконоти гидроэнергетикии Тоҷикистон дар Конфронси 29-уми ҷаҳонии сармоягузорӣ дар Шарҷа муаррифӣ гардид
Пахтакорӣ яке аз бахшҳои муҳими соҳаи кишоварзии ноҳияи Данғара ҳисобида мешавад
РУШДИ САЙЁҲӢ. Имсол ба вилояти Хатлон беш аз 900 ҳазор сайёҳ ташриф овардааст
Раванди омодагӣ ба Конфронси чоруми байналмилалии сатҳи баланд оид ба Даҳсолаи байналмилалии амал «Об барои рушди устувор» баррасӣ шуд
Намояндаи Тоҷикистон дар ҷаласаи Шурои байнидавлатӣ оид ба сиёсати зиддиинҳисорӣ дар Беларус иштирок намуд
Тоҷикистон ва Чин тасмим гирифтаанд, ки ҳамкориро дар соҳаи обуҳавошиносӣ тақвият диҳанд
Вазирони энергетикаи Тоҷикистон ва Эрон масъалаҳои иҷрои протоколи Комиссияи муштараки байниҳукуматиро баррасӣ намуданд
Татбиқи марҳилаи чоруми Лоиҳаи метеорологии Финляндия ва Тоҷикистон баррасӣ гардид
ҚУРБИ АСЪОР: 1 доллари ИМА аз 9.2271 то 9.3000 сомонӣ муқаррар шудааст
Ташаббусҳои глобалии Тоҷикистон дар соҳаи об дар ҷаласаи Конфронси исломии вазирони масъул оид ба масъалаҳои об дар Ҷидда баррасӣ гардид
Дар ноҳияи Восеъ иншооти таъйиноти гуногун мавриди истифода қарор гирифтанд