Ҷаласаи якуми ҳайати Комиссияи Озмуни ҷумҳуриявии «Илм – фурӯғи маърифат» дар соли 2025 баргузор гардид

ДУШАНБЕ, 12.04.2025. /АМИТ «Ховар»/. Ҷаласаи якуми ҳайати Комиссияи Озмуни ҷумҳуриявии «Илм – фурӯғи маърифат» дар соли 2025 таҳти раёсати раиси комиссияи озмун, муовини Сарвазири Ҷумҳурии Тоҷикистон Дилрабо Мансурӣ баргузор гардид. Дар ин хусус ба АМИТ «Ховар» аз маркази матбуоти Вазорати маориф ва илми Ҷумҳурии Тоҷикистон хабар доданд.

Муовини Сарвазири Тоҷикистон иброз дошт, ки Озмуни ҷумҳуриявии «Илм – фурӯғи маърифат» таҳти назорат ва cарпарастии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон баргузор гардида, бо мақсади рушди тафаккури техникӣ, тарғиби ҷаҳонбинии илмӣ, дастрасӣ пайдо кардан ба техникаву технология, тавсеаи ихтироъкорӣ ва навоварӣ, пайванди илм бо истеҳсолот, ҷалби бештари хонандагону донишҷӯён, магистрантону докторантон аз рӯйи ихтисос (PhD), ходимони илмӣ ва дигар қишрҳои ҷомеа ба омӯзиши фанҳои риёзӣ, дақиқ ва табиӣ, ҳамчунин дарёфт ва муаррифии истеъдодҳои нав дар ин самтҳо гузаронида мешавад.

«Баргузории озмун давоми солҳои 2021-2024 нишон дод, ки байни ҷавонону наврасони мамлакат таваҷҷуҳ ба омӯзиши илмҳои риёзӣ, дақиқ ва табиӣ ба маротиб зиёд гардида, барои дарёфт ва тарбия намудани мутахассисони баландихтисоси самтҳои муҳандисию техникӣ замина гардидааст. Бо мақсади боз ҳам такмил ва таҳким бахшидани раванди баргузории озмун ва ҳавасмандсозии бештари иштирокчиён дар соли 2025 дар озмун номинатсияи нав — «зеҳни сунъӣ ва барномасозӣ» низ илова карда шуда, шумораи ҷойҳо барои ғолибон дар даври ҷумҳуриявӣ аз 132 ба 156 расонида шуд»,- таъкид дошт муовини Сарвазир.

Иброз гардид, ки бо дастури Сарвари давлат ҳаҷми маблағи мукофот барои ҳамаи ғолибони озмун ду баробар зиёд карда шуда, барои озмун аз Фонди захиравии Президенти Ҷумҳурии Тоҷикистон 9 миллиону 220 ҳазор сомонӣ ҷудо гардид.

Раиси комиссия доир ба вазифаҳои Комиссияи ҷумҳуриявӣ ва салоҳияти он тибқи Низомномаи Озмуни ҷумҳуриявии «Илм – фурӯғи маърифат» баромад карда, вазифаҳои комиссияро дар самти баргузор намудани озмун иброз намуд.

Таъкид шуд, ки ба хотири таъмини пурраи шаффофият, пешгирӣ аз ҳолатҳои баҳогузории ғайримеъёрӣ ва қонеъ гардонидани дархости иштирокчиён зарур аст, ки баргузории даврҳои сеюм ва чоруми озмун пурра ба навор гирифта шавад.

Пешниҳод гардид, ки даври якуми озмун нимаи дуюми моҳи апрел дар назди муассисаҳои таълимӣ, илмӣ ва дигар ташкилот баргузор карда шавад.

Ёдовар мешавем, ки озмуни имсола аз 8 номинатсия иборат аст:

– математика (арифметика, алгебра, геометрия);

– физика ва астрономия;

– химия;

– биология (ботаника, зоология, анатомия);

– география;

– технологияи иттилоотӣ;

– зеҳни сунъӣ ва барномасозӣ;

– ихтироъкорӣ ва навоварӣ.

Дар охир ҳайати ҷаласаи озмун барои  баргузории даври аввали он ва андешидани тадбирҳои зарурӣ қарорҳои дахлдор қабул намуд.

АКС: Маркази матбуоти Вазорати маориф ва илми Ҷумҳурии Тоҷикистон