Дар Душанбе даври омӯзишӣ аз рӯи ихтисоси кафшергарӣ оғоз шуд

ДУШАНБЕ, 03.04.2025. /АМИТ «Ховар»/. 2 апрел дар Муассисаи давлатии «Маркази рушди ҳунармандӣ ва малакаҳои касбии муосир»-и Вазорати меҳнат, муҳоҷират ва шуғли аҳолии Ҷумҳурии Тоҷикистон даври омӯзишӣ аз рӯи ихтисоси кафшергарӣ барои 35 шаҳрванди мамлакат оғоз шуд.

Тавре ба АМИТ «Ховар» аз Вазорати меҳнат, муҳоҷират ва шуғли аҳолии Ҷумҳурии Тоҷикистон иттилоъ доданд, даври омӯзиши касб дар доираи Ёддошти тафоҳум байни Вазорати меҳнат, муҳоҷират ва шуғли аҳолии Ҷумҳурии Тоҷикистон ва Вазорати шуғл ва меҳнати Ҷумҳурии Корея ва Маркази маҳаллии низоми Employment Permit System /EPS/ амалӣ мешавад.

Ҳамчунин дар ин рӯз вохӯрии Вазири меҳнат, муҳоҷират ва шуғли аҳолии Ҷумҳурии Тоҷикистон Солеҳа Холмаҳмадзода бо Сафири Ҷумҳурии Корея дар Ҷумҳурии Тоҷикистон Ҷонг Сонг Шик доир шуд.

Дар он ҷонибҳо ҷараёни иҷрои муқаррароти Ёддошти тафоҳум байни Вазорати меҳнат, муҳоҷират ва шуғли аҳолии Ҷумҳурии Тоҷикистон ва Вазорати шуғл ва меҳнати Ҷумҳурии Кореяро мавриди баррасӣ қарор доданд.

АКС: Вазорати меҳнат, муҳоҷират ва шуғли аҳолии Ҷумҳурии Тоҷикистон