Дар Самарқанд нишасти сарони давлатҳои Осиёи Марказӣ — Иттиҳоди Аврупо баргузор мешавад

ДУШАНБЕ, 02.04.2025 /АМИТ «Ховар»/. 3-4 апрел дар шаҳри Самарқанди Ҷумҳурии Узбекистон нишасти сарони давлатҳои Осиёи Марказӣ — Иттиҳоди Аврупо баргузор мешавад. Дар ин хусус АМИТ «Ховар» бо истинод ба Хадамоти матбуоти Президенти Ҷумҳурии Узбекистон хабар медиҳад.

Тибқи рӯзнома, дурнамои рушди муносибатҳои гуногунҷанба ва ҳамкории амалии кишварҳои Осиёи Марказӣ ва Иттиҳоди Аврупо баррасӣ мешавад.

Иштирокдорон инчунин масъалаҳои тавсеаи ҳамкории сармоягузорӣ ва афзоиши гардиши мол, пешбурди барномаҳои муштарак ва лоиҳаҳои ҳамкорӣ дар соҳаҳои инноватсия, энергетикаи сабз, саноати истихроҷ, кишоварзӣ, нақлиёт, логистика ва рақамисозӣ, идомаи табодули фаъол дар соҳаҳои фарҳанг, сайёҳӣ, илму маориф ва дигар соҳаҳои афзалиятнокро баррасӣ менамоянд.

Ҳамзамон оид ба ҷанбаҳои муҳими сиёсати байналмилалӣ ва минтақавӣ табодули афкор анҷом дода мешавад.

4 апрел иштироки роҳбарони ҳайатҳо дар ҷаласаи пленарии Форуми байналмилалии иқлими Самарқанд низ дар назар аст.

АКС: Хадамоти матбуоти Президенти Ҷумҳурии Узбекистон