Иштирокдорони Конфронси байналмилалии сатҳи баланд оид ба ҳифзи пиряхҳо аз Чин бо яке аз маконҳои таърихии Тоҷикистон шинос шуданд

ДУШАНБЕ, 31.05.2025. /АМИТ «Ховар»/. 30 май иштирокдорони Конфронси байналмилалии сатҳи баланд оид ба ҳифзи пиряхҳо аз Ҷумҳурии Мардумии Чин ба  шаҳри Ҳисор рафта, бо ҳунарҳои миллӣ ва таърихи ин минтақа шинос шуданд.

Тавре ба АМИТ «Ховар» аз Кумитаи иҷроияи Ҳизби Халқии Демократии Тоҷикистон иттилоъ доданд, меҳмонон бо Маркази омӯзиши ҳунарҳои мардумӣ ва коргоҳи дӯзандагии Кумитаи иҷроияи Ҳизби Халқии Демократии Тоҷикистон дар шаҳри Ҳисор шинос шуданд.

Маркази омӯзиши ҳунарҳои мардумӣ ва коргоҳи дӯзандагии Кумитаи иҷроияи Ҳизби Халқии Демократии Тоҷикистон дар шаҳри Ҳисор дар доираи ҳамкории муштараки Ҳизби Халқии Демократии Тоҷикистон ва Ҳизби Коммунистии Чин таъсис ёфта, дар он духтарони маҳаллӣ ба касби дӯзандагӣ фаро гирифта шудаанд.

Дар идома меҳмонон Осорхона, Арк, Қасри Ҳоким, Аскархона, Амфитеатр ва дӯкону растаҳои ҳунармандии Мамнуъгоҳи таърихию фарҳангии Ҳисорро тамошо карда, бо таърихи Ҳисори бостон шинос шуданд.

 АКС: Кумитаи иҷроияи Ҳизби Халқии Демократии Тоҷикистон