Дар Роғун бахшида ба Рӯзи Ваҳдати миллӣ 5 иншоот ба истифода дода мешавад

ДУШАНБЕ, 18.06.2025. /АМИТ «Ховар»/. Бахшида ба ҷашни 35-солагии Истиқлолияти давлатии Ҷумҳурии Тоҷикистон дар шаҳри Роғун бунёди 105 иншооти гуногун ба нақша гирифта шудааст. Инчунин дар доираи нақшаи чорабиниҳои ҷашни Ваҳдати миллӣ 5 иншооти таъиноти гуногун мавриди истифода қарор дода мешавад.

Тавре ба хабарнигори минтақавии АМИТ «Ховар» мудири шуъбаи сохтмон ва меъмории шаҳри Роғун Раҳмиддин Зайдов иттилоъ дод, ин 5 иншоот- осиёби обӣ дар деҳаи Хубдара, сохтмони нуқтаи шустушӯй, таъмири нақлиёт, фурӯши қисмҳои эҳтиётии мошинҳо ва қабули сайёҳон, маркази хизматрасонӣ дар деҳаи Чашмаи Кулло, Маркази савдои «Олами кӯдакон» дар кӯчаи Норакиён ва мағоза дар деҳаи Деҳқонобод мебошанд, ки дар ин ҷо даҳҳо нафар сокинони шаҳр бо кори доимӣ таъмин мегарданд.

Аз 105 иншооти ба нақшагирифташуда, 38 иншоот дар маркази шаҳри Роғун, 14 иншоот дар шаҳраки Оби Гарм, 43 иншоот дар Ҷамоати деҳоти Қади Об ва 10 иншоот дар Ҷамоати деҳоти Сичароғ бунёд мегардад. 11 адади он аҳамияти ҷумҳуриявӣ дошта, аз ҳисоби буҷети ҷумҳуриявӣ сохта мешаванд.

То имрӯз дар шаҳр 65 иншоот сохта, ба истифода дода шудааст, ки 65 фоизи нақшаро ташкил медиҳад. Ба ин васила 158 ҷойҳои корӣ таъсис дода шуда, дар иншооти боқимондаи ҷашнӣ корҳои сохтмонӣ бомаром идома доранд.

АКС: Мақомоти иҷроияи ҳокимияти давлатии шаҳри Роғун