Дар шаҳри Кӯлоб 1300 метр роҳ мумфарш карда мешавад

 ДУШАНБЕ, 10.06.2025. /АМИТ «Ховар»/. Бо мақсади дар сатҳи баланд истиқбол гирифтани ҷашни 35-солагии Истиқлоли давлатӣ ва беҳтар намудани инфрасохтори роҳҳо дар деҳаи Маҳмадалӣ Ғаффори Ҷамоати деҳоти Зиракии шаҳри Кӯлоб дар масофаи 1300 метр мумфаршсозии роҳи дохилии аҳамияти ҷумҳуриявӣ оғоз гардидааст. Дар ин хусус ба АМИТ «Ховар» аз Мақомоти иҷроияи ҳокимияти давлатии шаҳри Кӯлоб иттилоъ доданд.

Ин роҳ дар шоҳроҳи Кӯлоб–Ховалинг–Балҷувон ҷойгир мебошад. Корҳои асфалтпӯшкунӣ бо маблағгузории Вазорати нақлиёти Ҷумҳурии Тоҷикистон амалӣ гардида, барои он 550 ҳазор сомонӣ ҷудо гардидааст.

Бунёди роҳ нишони пайванди устувории ҷомеа мебошад. Айни замон корҳои сохтмонӣ бо ҷалби мутахассисон ва техникаи зарурӣ оғоз гардидааст.

Дар мамлакат барои татбиқи сифатноки лоиҳаҳои сармоягузорӣ, сари вақт ва бо риояи меъёрҳои муосир амалӣ намудани бунёду навсозии роҳҳои дорои аҳамияти байналмилалӣ ва ҷумҳуриявӣ, инчунин инфрасохтори онҳо тадбирҳои зарурӣ  амалӣ мегарданд.

АКС: Мақомоти иҷроияи ҳокимияти давлатии шаҳри Кӯлоб