Муовини Сарвазир бо рафти корҳои сохтмонии манзилҳои зист барои оилаҳои аз заминҷунбӣ зарардидаи ноҳияи Рашт шинос шуд

ДУШАНБЕ, 11.06.2025. /АМИТ «Ховар»/. Имрӯз дар доираи дастуру супоришҳои Президенти Ҷумҳурии Тоҷикистон муҳтарам Эмомалӣ Раҳмон муовини Сарвазири Мамлакат Сулаймон Зиёзода бо рафти корҳои сохтмонӣ дар манзилҳои зист барои оилаҳои дар офати табиӣ — заминҷунбӣ зарардида дар ноҳияи Рашт шинос гардид. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии ноҳияи Рашт хабар медиҳад.

Муовини Сарвазири мамлакат бо ҷараёни корҳои сохтмонӣ ва ободонӣ дар ин мавзеъ аз наздик шинос гардид.

Ёдовар мешавем, ки 13 апрели соли 2025, соати 09:24 дар ҳудуди ҷумҳурӣ заминларза ба амал омад. Маркази он дар масофаи 160 километр дуртар аз шаҳри Душанбе ва 21 километр аз ноҳияи Рашт буда, қувваи заминҷунбӣ дар маркази он 5-6 балл, дар ҳудуди минтақаи Рашт 4-5 балл ва дар шаҳри Душанбе 3 баллро ташкил дод.

Тибқи маълумот, дар ин ноҳияҳо дар маҷмуъ 65 хонаи истиқоматӣ пурра ва 193 хона қисман вайрон шуда, ба 150 хонаи дигар осеби сабук ва ба 193 иншооти ёрирасон зарар расидааст. Аз ҷумла, 1 беморхонаи минтақавӣ, 2 бунгоҳи тиббӣ, 8 иншооти муассисаи таҳсилоти миёнаи умумӣ ва дигар иншоот зарар дидаанд.

Бояд иброз намуд, ки Ҳукумати Тоҷикистон барои бунёди манзилҳои нави истиқоматӣ, ба ҷойҳои бехавф кӯчонидани аҳолӣ, таъмини маводи хӯрокворӣ, масолеҳи сохтмонӣ ва дигар лавозимоти зарурӣ барои зарардидагони офати табиӣ тадбирҳои саривақтӣ меандешад.

Бо дастуру супоришҳои Пешвои миллат муҳтарам Эмомалӣ Раҳмон дар ноҳияи Рашт Ситоди ҷумҳуриявӣ оид ба бартарафсозии оқибатҳои офати табиӣ ташкил карда шудааст. Аъзои ситод пайваста аз аҳволи оилаҳои осебдида хабардор шуда, дар байни аҳолӣ корҳои фаҳмондадиҳӣ мегузаронанд.

АКС: Мақомоти иҷроияи ҳокимияти давлатии ноҳияи Рашт