ҶОМИ ОСИЁ-2027. Дастаи мунтахаби Тоҷикистон оид ба футбол бо тими Филиппин бо либоси сафед бозӣ мекунад

ДУШАНБЕ, 09.06.2025 /АМИТ «Ховар»/. Дастаи мунтахаби Тоҷикистон оид ба футбол бозии даври дуюми марҳилаи интихобии Ҷоми Осиё-2027-ро дар гурӯҳи «А» бо  тими миллии Филиппин бо либоси сафед анҷом медиҳад.

Тавре АМИТ «Ховар» бо истинод ба Федератсияи футболи Тоҷикистон хабар медиҳад, пеш аз ин бозӣ  дар варзишгоҳи «Ню-Кларк-Сити» бо иштироки масъулин, кумитаи тадорукоти маҳаллӣ, намояндагони мунтахабҳои Филиппин ва Тоҷикистон ҷаласа баргузор шуд.

Дар ҷаласа дастаҳо ранги пироҳанҳои худро интихоб намуданд. Дастаи мунтахаби Тоҷикистон дар ин бозӣ бо либоси сафед ва тими миллии Филиппин бо либоси кабуд ба варзишгоҳ мебароянд.

Бозии Филиппин ва Тоҷикистон  10 июн дар варзишгоҳи «Ню-Кларк-Сити» баргузор шуда, соати 19:00 ба вақти маҳаллӣ (16:00 ба вақти Душанбе) оғоз мешавад.

АКС: Федератсияи футболи Тоҷикистон