35-СОЛАГИИ ИСТИҚЛОЛИ ДАВЛАТӢ. Дар Хуҷанд 964 иншооти ҷашнӣ бунёд карда шудааст

ДУШАНБЕ, 17.07.2025 /АМИТ «Ховар»/. Бахшида ба ҷашни 35-солагии Истиқлоли давлатии Ҷумҳурии Тоҷикистон дар шаҳри Хуҷанд 964 иншоот бунёд карда шудааст. Дар ин хусус ба мухбири минтақавии АМИТ «Ховар» аз хадамоти матбуоти Раиси шаҳри Хуҷанд иттилоъ доданд.

Аз миқдори умумии иншоот 239 адади он дар шашмоҳаи якуми соли равон сохта шудааст. 36 иншоот дар соҳаи саноат, 4 иншоот дар соҳаи тандурустӣ, 5 иншоот дар соҳаи маориф, 18 иншоот дар соҳаи варзиш, 1 иншоот дар соҳаи истироҳатӣ-фарҳангӣ, 118 иншоот дар соҳаи савдою хизматрасонӣ, 37 бинои истиқоматӣ ва 2 иншооти гуногун бунёд, таъмиру таҷдид ва навсозӣ карда шуда, мавриди истифода қарор гирифтанд.

Дар шаҳри Хуҷанд шумораи корхонаҳои истеҳсолкунандаи маҳсулоти ивазкунандаи воридот низ зиёд шудааст. Дар ин давра аз ҷониби 126 корхонаи хурду калон ба маблағи 490,9 миллион сомонӣ маҳсулот истеҳсол гардидааст. Ин нисбат ба ҳамин давраи соли 2024 82,8 миллион сомонӣ ё 20,3 фоиз зиёд мебошад.

АКС: Хадамоти матбуоти Раиси шаҳри Хуҷанд