35-СОЛАГИИ ИСТИҚЛОЛИ ДАВЛАТӢ. Дар ноҳияи Рашт 307 иншоот бунёд карда мешавад

ДУШАНБЕ, 10.07.2025 /АМИТ «Ховар»/. Ба ифтихори ҷашни 35-солагии Истиқлоли давлатии Ҷумҳурии Тоҷикистон дар ноҳияи Рашт сохтмони 307 иншоот ба нақша гирифта шудааст. Аз ин теъдод то имрӯз 213 иншоот мавриди истифода қарор гирифтааст. Дар 94 иншооти дигар корҳои сохтмонӣ босуръат ҷараён доранд. Дар ин хусус аз Мақомоти иҷроияи ҳокимияти давлатии ноҳияи Рашт ба мухбири минтақавии АМИТ «Ховар» иттилоъ доданд.

Ҳамчунин дар доираи амалишавии «Барномаи рушди иқтисодию иҷтимоии ноҳияи Рашт барои солҳои 2021-2025» боз 256 иншооти дигар сохта мешаванд. Дар соҳаи маориф 39 бинои муассисаи таълимӣ, тандурустӣ 15 бинои беморхонаву маркази саломатӣ ва дар соҳаи варзиш 34 толору майдонҳои варзишӣ бунёд карда мешаванд.

Танҳо ба истиқболи таҷлили 28-умин солгарди Рӯзи Ваҳдати миллӣ дар ноҳияи Рашт толори варзишӣ ва пули мошингузар дар деҳаи Бедаки Ҷамоати деҳоти Навдӣ ва пойгоҳи обкашӣ дар Ҷамоати шаҳраки Ғарм мавриди истифода қарор дода шуданд.

АКС: Мақомоти иҷроияи ҳокимияти давлатии ноҳияи Рашт