Дар деҳаи Томини ноҳияи Айнӣ мумфаршкунии роҳи дохилидеҳавӣ оғоз ёфт

ДУШАНБЕ, 16.07.2025 /АМИТ «Ховар»/. Бахшида ба 35-солагии Истиқлоли давлатӣ дар деҳаи Томини ноҳияи Айнӣ таъмиру мумфаршкунии роҳи дохилидеҳавӣ, ки қисме аз роҳи Айнӣ – Кӯҳистони Мастчоҳро дар бар мегирад, оғоз гардид.

Тавре ба АМИТ «Ховар» аз Мақомоти иҷроияи ҳокимияти давлатии ноҳияи Айнӣ хабар доданд, зиёда аз 1 километри роҳи деҳа бо дастгирии сокини ватандӯст — раиси хоҷагии деҳқонии кооперативии «Истиқлол» Абдусодиқ Шоев мумфарш карда мешавад. Таъмиру навсозии роҳро Муассисаи давлатии назорати роҳҳои автомобилии ноҳия ва филиали Ширкати саҳомии «Инновейтив Роуд Солюшнз ЛТД»-и Ҷумҳурии Тоҷикистон дар ноҳияи Айнӣ ба уҳда доранд.

Раиси ноҳияи Айнӣ Равшан Раҳимзода таъмири роҳро аз беҳтарин амалҳои хайру савоб, намунаи ибрат барои фарзандон ва авлотар аз маъракаҳои исрофкорӣ маънидод намуда, ба сокинони ҳимматбаланди деҳаи Томин аз номи Мақомоти иҷроияи ҳокимияти давлатии ноҳияи Айнӣ изҳори сипос намуд.

Корҳои таъмиру мумфаршкунии роҳҳо дар ҳамаи деҳаҳои ноҳияи Айнӣ идома доранд.

АКС: Мақомоти иҷроияи ҳокимияти давлатии ноҳияи Айнӣ