Дар Беморхонаи марказии шаҳри Исфара шуъбаи нав ба истифода дода шуд

ДУШАНБЕ, 20.08.2025. /АМИТ «Ховар»/. Ба истиқболи ҷашни бузурги миллӣ- 35-солагии Истиқлолияти давлатии Ҷумҳурии Тоҷикистон дар Беморхонаи марказии шаҳри Исфара шуъбаи амрози занона мавриди истифода қарор дода шуд. Дар ин хусус ба АМИТ «Ховар» аз Мақомоти иҷроияи ҳокимияти давлатии шаҳри Исфара хабар доданд.

Бинои шуъба бо харҷи беш аз 1 миллиону 400 ҳазор сомонӣ  пурра таъмиру навсозӣ шуда, бо дастгирии Вазорати тандурустӣ ва ҳифзи иҷтимоии аҳолии Ҷумҳурии Тоҷикистон бо дастгоҳҳои муосири тиббӣ ҷиҳозонида шудааст. Инчунин саҳни бино бо харҷи 57 ҳазор сомонӣ мумфарш карда шуд.

Мавриди истифодаи ниёзмандон қарор дода шудани бинои пурра таъмиру навсозишудаю муҷаҳҳази шуъбаи амрози занона ва фароҳам сохтани шароити созгору заминаи хуби моддӣ–техникӣ имкон медиҳанд, ки сатҳу сифати хизматрасонии тиббӣ  низ беҳтар карда шавад.

Кормандони Беморхонаи марказии шаҳри Исфара кӯшиш ба харҷ медиҳанд, ки дар нигоҳдории саломатии мардум саҳми арзанда гузоранд.

АКС: Мақомоти иҷроияи ҳокимияти давлатии шаҳри Исфара