Дар деҳаҳои Конибодом кӯдакистонҳои нав ба истифода дода мешаванд

ДУШАНБЕ, 24.08.2025 /АМИТ «Ховар»/. Дар деҳаҳои Сомониён, Равот ва Ғалчамуллои шаҳри Конибодом сохтмонии муассисаҳои томактабӣ идома дорад. Дар ин хусус ба АМИТ «Ховар» аз Мақомоти иҷроияи ҳокимияти давлатии шаҳри Конибодом  хабар доданд.

Тибқи иттилои масъулин, баъди ба истифода додани иншоот 600 кӯдак ба таълиму тарбия фаро гирифта мешаванд.

Дар айни замон сохтмон ҷараён дошта, тибқи нақша, барои таълиму тарбияи кӯдакон шароити мусоид фароҳам оварда мешаванд.

Ёдовар мешавем, ки соли 2024 дар Паёми Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии Ҷумҳурии Тоҷикистон «Дар бораи самтҳои асосии сиёсати дохилӣ ва хориҷии ҷумҳурӣ» ба роҳбарони вилоятҳо ва шаҳру ноҳияҳо дастур дода шуд, ки дар панҷ соли оянда бо назардошти афзоиши аҳолӣ дар ҳар маҳалли аҳолинишин, ки 100 оила зиндагӣ мекунад, як муассисаи томактабӣ бунёд намоянд.

Сарвари давлат  дастур доданд, ки дар панҷ соли оянда бо истифода аз ҳамаи сарчашмаҳои маблағгузорӣ ва бо назардошти ҳадафи гузошта барои фарогирии 50 фоизи кӯдакони синни томактабӣ бунёди 800 муассисаи таҳсилоти томактабӣ ва беш аз 1000 муассисаи таҳсилоти умумӣ бояд таъмин карда шавад.

АКС: Мақомоти иҷроияи ҳокимияти давлатии шаҳри Конибодом