Дар Тоҷикистон лоиҳаи «Football For Schools»-и ФИФА амалӣ карда мешавад

ДУШАНБЕ, 21.08.2025 /АМИТ «Ховар»/. Дар Тоҷикистон лоиҳаи «Football For Schools» (Футбол барои мактабҳо)-и ФИФА амалӣ карда мешавад. Дар доираи оғози лоиҳа ситораи футболи ҷаҳонӣ, беҳтарин футболбози Аврупо дар соли 1994 Христо Стоичков ба Тоҷикистон меояд. Дар ин хусус ба АМИТ «Ховар» аз Федератсияи футболи Тоҷикистон хабар доданд.

Дар доираи оғози лоиҳаи «Football For Schools» 25-26 август дар шаҳри Душанбе барои 45 омӯзгори тарбияи ҷисмонии мактабҳои таҳсилоти умумии мамлакат семинари омӯзишӣ баргузор карда мешавад. Ҳамчунин 27 август дар варзишгоҳи «Душанбе-Арена» ҷашнвораи футбол баргузор мегардад.

Дар асоси нақшаи Лигаи футболи кӯдакону наврасони Тоҷикистон соли 2025 лоиҳаи «Football For Schools»-и ФИФА 130 мактаби кишварро фаро мегирад. Ин лоиҳа ба омӯзиши ҷаҳонӣ, рушд ва ҷалби кӯдакон ба футбол равона шудааст.

АКС: Федератсияи футболи Тоҷикистон