Доир ба заминаҳо, таҳаввулот ва дурнамои Истиқлоли давлатӣ машварати илмӣ-назариявӣ баргузор шуд

ДУШАНБЕ, 30.08.2025 /АМИТ «Ховар»/. Бахшида ба 34-солагии Истиқлоли давлатӣ 29 август дар Институти фалсафа, сиёсатшиносӣ ва ҳуқуқи ба номи А.Баҳоваддинови Академияи миллии илмҳои Тоҷикистон дар мавзуи «Заминаҳо, таҳаввулот ва дурнамои Истиқлоли давлатӣ дар Тоҷикистон» машварати илмӣ-назариявӣ доир гардид.

Тавре АМИТ «Ховар» бо истинод ба Академияи миллии илмҳо хабар медиҳад, дар машварат дар мавзуи «Заминаҳои ҳуқуқии таҳкими Истиқлолияти давлатӣ» маъруза пешниҳод гардид. Иброз гардид, ки баъди ба даст овардани Истиқлоли давлатӣ дар Тоҷикистон ислоҳоти куллии тамоми соҳаҳои ҳаёти ҷамъиятӣ ба амал оварда шуд.

Аз оғози даврони соҳибистиқлолӣ рушди маориф, илму фарҳанг дар сиёсати давлат ва Ҳукумати Тоҷикистон самти афзалиятнок эълон гардид. Файзи Истиқлол Тоҷикистонро дар арсаи байналмилалӣ ҳамчун ҷумҳурии мустақилу ҳуқуқбунёд муаррифӣ намуд. Имрӯз Истиқлоли давлатии Тоҷикистонро зиёда аз 180 мамлакати дунё расман эътироф намудаанд, ки ин нишонаи возеҳи Истиқлоли давлатӣ ба ҳисоб меравад.

Истиқлоли давлатӣ бузургтарин ва муқаддастарин неъмат, нишонаи олии ҳувияти миллӣ, ифтихор, ватандӯстӣ, рамзи ҳастии миллати бостонӣ, соҳибихтиёру соҳибдавлатии тоҷикон ва асоси хушбахтиву сарбаландии сокинони Тоҷикистон мебошад.

Бахшида ба Истиқлоли давлатӣ дар институт то 16 сентябр конференсияҳои илмӣ-назариявӣ баргузор мегарданд.

АКС: Академияи миллии илмҳои Тоҷикистон