35-СОЛАГИИ ИСТИҚЛОЛИ ДАВЛАТӢ. Дар Хуҷанд 1000 иншоот ба истифода дода шудааст

ДУШАНБЕ,  08.09.2025.  /АМИТ «Ховар»/. Ба истиқболи ҷашни 35-солагии Истиқлоли давлатӣ дар шаҳри Хуҷанд сохтмон, навсозӣ ва таъмиру таҷдиди 950 иншооти ҳаётан муҳим ба нақша гирифта шуда буд. То имрӯз нақша пеш аз муҳлат иҷро ва беш аз 1000 иншоот дар шаҳр мавриди истифода қарор дода шуд. Дар ин хусус ба АМИТ «Ховар» аз Мақомоти иҷроияи ҳокимияти давлатии  шаҳри Хуҷанд хабар доданд.

Бинои маъмурии Палатаи савдо ва саноати вилояти Суғд иншооти ҷашнӣ буда, бо бунёду мавриди истифода қарор гирифтани он барои кормандон шароити мусоиди кор фароҳам оварда мешавад. Бино аз таҳхона ва 4 ошёна иборат буда, дар он ҳуҷраҳои корӣ барои кормандон, толорҳои конфронсӣ, толорҳои намоиш ва ошхона ҷойгир мебошанд.

Ҳамчунин сохтмони бинои Суди вилояти Суғд идома дорад. Бино аз таҳхона ва 7 ошёна иборат буда, дар он ҳуҷраҳои корӣ, маҷлисгоҳ, ошхона ва дигар шароити зарурӣ барои кормандони мақомоти Суди вилоят фароҳам оварда мешавад. Лоиҳаи иншоот мутобиқ ба талаботи замон таҳия гардида, бо истифода аз масолеҳи сохтмонии ватанӣ бо сифати баланд ва дар муҳлати муайянгардида бунёд мегардад.

Дар шаҳри Хуҷанд сохтмони бинои нави зершуъбаи шаҳраки милитсияи соҳили рости Сирдарёи шуъбаи Вазорати корҳои дохилии Ҷумҳурии Тоҷикистон ва таъмиру навсозии бинои филиали Донишкадаи ҳарбии Вазорати мудофиаи Ҷумҳурии Тоҷикистон идома дорад.

АКС: Мақомоти иҷроияи ҳокимияти давлатии  шаҳри Хуҷанд