Дар Ҳисор Рӯзи Истиқлолияти давлатӣ бо барномаи рангини консертӣ ва театрӣ таҷлил гардид

ДУШАНБЕ, 10.09.2025 /АМИТ «Ховар»/. 34-солагии ҷашни Истиқлоли давлатии Ҷумҳурии Тоҷикистон дар шаҳри Ҳисор бошукуҳ таҷлил гардид, иттилоъ медиҳад АМИТ «Ховар» бо истинод ба Мақомоти иҷроияи ҳокимияти давлатии шаҳри Ҳисор.

Намояндаи Ҳукумати Ҷумҳурии Тоҷикистон- муовини Сарвазири Тоҷикистон Дилрабо Мансурӣ зимни иштирок дар тантанаҳои идонаи ҷашни 34-солагии Истиқлоли давлатии Ҷумҳурии Тоҷикистон сокинони шаҳри Ҳисорро аз номи Ҳукумати Ҷумҳурии Тоҷикистон бо ин ҷашни бузурги миллӣ шодбош гуфт.

Иброз гардид, ки сокинони шаҳри Ҳисор ҷашни Истиқлоли давлатиро бо комёбиҳои назаррас истиқбол намуданд. Далели рашани он дар остонаи ҷашни 34-солагии истиқлолият ба истифода додани беш аз 50 иншооти таъйиноти гуногун мебошад.

Тантанаҳои ҷашниро барномаи театрии ҳунармандони шуъбаи фарҳанги шаҳр, инчунин сарояндаҳои маъруфи ҷумҳурӣ ва гурӯҳи рақсии «Сарвиноз», ансамбли этнографии «Бобоҷонҳо» ва ансамбли созӣ-овозии «Шодмон»-и Филармонияи халқии Ҳисор ба номи Тоҷиддин Муҳиддинов рангинтар намуданд.

АКС: Мақомоти иҷроияи ҳокимияти давлатии шаҳри Ҳисор