Имконоти сайёҳии Тоҷикистон дар Москва муаррифӣ гардид

Сентябрь 1, 2025 09:24

ДУШАНБЕ, 01.09.2025 /АМИТ «Ховар»/. 29 август бо ташаббуси Сафорати Ҷумҳурии Тоҷикистон дар Федератсияи Русия дар ҳамкорӣ бо департаменти ҳамкории бисёрҷонибаи иқтисодӣ ва лоиҳаҳои махсуси Вазорати рушди иқтисоди Федератсияи Русия дар мавзуи «Имконияти сармоягузорӣ дар бахши сайёҳии Ҷумҳурии Тоҷикистон» ҳамоиш баргузор гардид. Дар ин хусус ба АМИТ «Ховар» аз Сафорати Тоҷикистон дар Москва хабар доданд.

Дар бинои сафорат ҳунарҳои мардумӣ, видеороликҳои ҷолиб дар бораи имконияти сайёҳӣ, намоиши китобҳо оид ба таърихи халқи тоҷик ва маводи таблиғотии сайёҳӣ ба маърази тамошо гузошта шуд.

Сафири Фавқулода ва Мухтори Тоҷикистон дар Русия Давлатшоҳ Гулмаҳмадзода доир ба иқдоми Ҳукумати Ҷумҳурии Тоҷикистон дар самти рушди соҳаи сайёҳӣ ва имконоту захираҳои сайёҳӣ дар ҷумҳурӣ маълумоти муфассал дод.

Роҳбари намояндагии дипломатӣ таъкид намуд, ки иқтидори сайёҳии Тоҷикистон ҷалбкунанда ва беназир аст, зеро мамлакат таърихан яке аз марказҳои тамаддуни Шоҳроҳи Бузурги Абрешим буда, мероси бузурги фарҳангӣ ва таърихӣ, гуногунии манзараҳои табиӣ ва олами набототу ҳайвонотро доро мебошад.

Намояндагони ширкатҳои сайёҳии ватанӣ оид ба имконияти сайёҳии Тоҷикистон, ба роҳ мондани хатсайрҳои сайёҳӣ, таҷрибаи пешкаш намудани маҷмуи хизматрасониҳо ба ширкатҳои сайёҳии Русия рӯнамоҳо манзур намуда, барои ташкили хатсайрҳои сайёҳии мутақобил изҳори ҳавасмандӣ намуданд.

Баъдан вохӯрии дуҷонибаи ширкатҳои сайёҳии ҳарду давлат дар шакли «Соҳибкор бо соҳибкор» (B2B) баргузор гардида, дар фарҷоми чорабинӣ байни ширкатҳои сайёҳии Тоҷикистону Русия 4 санади ҳамкорӣ ба имзо расид.

Дар маҷмуъ, меҳмонон имкони хуби шиносоӣ бо осори таърихию фарҳангӣ ва ҳамзамон рушди муосири соҳаҳои Тоҷикистон, аз ҷумла зарфияти сайёҳиро азхуд карданд.

Дар чорабинӣ намояндаи Кумитаи рушди сайёҳии назди Ҳукумати Ҷумҳурии Тоҷикистон, намояндагони Комиссияи ҷуғрофӣ ва сайёҳии фароғатии шаҳри Москва, роҳбарони ширкатҳои сайёҳии ватанӣ ва ширкатҳои сайёҳии кишвари иқомат иштирок намуданд.

Ёдовар бояд шуд, ки сафорат бо мақсади ташвиқу таблиғи имконияти сайёҳӣ, аз ҷумла оид ба сайёҳии табобатӣ, экологӣ ва кӯҳнавардӣ дар ҳамкорӣ бо шабакаҳои бонуфузи телевизионӣ, аз қабили барномаи «Магия вкуса»-и шабакаи «Моя планета», барномаи «Поедем, поедим»-и шабакаи НТВ-и Федератсияи Русия видеороликҳои рекламавӣ таҳия сохта, тавассути онҳо мавзеъҳои сайёҳии Тоҷикистонро тарғиб намуд.

АКС: Сафорати Тоҷикистон дар Русия

Сентябрь 1, 2025 09:24

Хабарҳои дигари ин бахш

Мамнуъгоҳи биосферии «Ромит» ба Шабакаи ҷаҳонии мамнуъгоҳҳои ЮНЕСКО ворид карда шуд
27 СЕНТЯБР — РӮЗИ ҶАҲОНИИ САЙЁҲӢ. Воридшавии сайёҳони хориҷӣ ба Тоҷикистон дар ҳашт моҳ 34% афзоиш ёфтааст
Дар Ню-Йорк ҷаласаи Шурои вазирони корҳои хориҷии кишварҳои аъзои МҲТБО баргузор шуд
Дар Ню-Йорк ҷаласаи ғайринавбатии Шурои вазирони корҳои хориҷии СААД баргузор гардид
«САЙРИ ДУШАНБЕ». Ба муносибати Рӯзи ҷаҳонии сайёҳӣ дар пойтахт хатсайри ройгон ташкил карда мешавад
Дар Тоҷикистон Конфронси нахустини Душанбе оид ба зеҳни сунъӣ баргузор мегардад
Сироҷиддин Муҳриддин бо муовини котиби давлатии ИМА Кристофер Ландау мулоқот анҷом дод
Дар Ню-Йорк масъалаи омодагӣ ба Конфронси оби СММ-2028 дар Душанбе баррасӣ гардид
Сироҷиддин Муҳриддин дар ҷаласаи солонаи Гурӯҳи 77 ва Чин иштирок намуд
Ҳамкории дуҷониба байни Тоҷикистон ва Олмон баррасӣ гардид
Дар Душанбе брифинг оид ба омодагӣ ба Саммити Иттиҳоди Давлатҳои Мустақил баргузор гардид
Сироҷиддин Муҳриддин дар чорабинии сатҳи баланди «Ташаккули ояндаи об» иштирок намуд