Афзалияти стратегии Тоҷикистон дар самтҳои идоракунии устувори молияи давлатӣ, молияи «сабз» ва иқлим дар Амрико баррасӣ гардид

ДУШАНБЕ, 17.10.2025 /АМИТ «Ховар»/. 15 октябр дар ҳошияи ҷаласаҳои солонаи Бонки ҷаҳонӣ ва Хазинаи байналмилалии асъор дар шаҳри Вашингтон мулоқоти ҳайати Ҷумҳурии Тоҷикистон таҳти роҳбарии Вазири молияи Ҷумҳурии Тоҷикистон Файзиддин Қаҳҳорзода бо Директори Департаменти Ховари Миёна ва Осиёи Марказии Хазинаи байналмилалии асъор Ҷиҳад Азур баргузор шуд.

Тавре АМИТ «Ховар» бо истинод ба Вазорати молия хабар медиҳад, ҷонибҳо ҳолати кунунӣ ва дурнамои ҳамкориро баррасӣ намуда, нақши дастгирии Хазинаи байналмилалии асъорро дар татбиқи ислоҳот ва таҳкими устувории молиявӣ дар Тоҷикистон баланд арзёбӣ намуданд.

Мусоҳибон барои тақвияти минбаъдаи ҳамкорӣ бо назардошти афзалияти стратегии Ҷумҳурии Тоҷикистон, аз ҷумла дар самтҳои идоракунии устувори молияи давлатӣ, молияи «сабз» ва иқлим, идоракунии қарзи давлатӣ ва ғайра изҳори омодагӣ намуданд.

Изҳори итминон карда шуд, ки мувофиқаҳои ҳосилшуда ба татбиқи саривақтии ислоҳот ва лоиҳаҳои авлавиятнок мусоидат менамоянд.

АКС: Вазорати молияи Ҷумҳурии Тоҷикистон