Ҷавонони далери шаҳри Бӯстонро ба хизмати ҳарбӣ гусел намуданд

ДУШАНБЕ, 02.10.2025 /«Ховар»/. Дар шаҳри Бӯстони вилояти Суғд маросими гусели ҷавонон ба хизмат дар сафи Қувваҳои Мусаллаҳи Ҷумҳурии Тоҷикистон баргузор гардид. Дар ин хусус ба АМИТ «Ховар» аз Мақомоти иҷроияи ҳокимияти давлатии шаҳри Бӯстон хабар доданд.

Зимни ҷамъомад иброз гардид, ки Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳи Ҷумҳурии Тоҷикистон муҳтарам Эмомалӣ Раҳмон сиёсати давлатии ҷавононро яке аз рукнҳои аввалиндараҷаи сиёсати Ҳукумати ҷумҳурӣ шуморида, таъкид медоранд, ки «саҳми ҷавонон дар ҳифзи Ватан-Модар шоистаи таҳсин буда, онҳо дар тамоми ҷузъу томҳои Қувваҳои Мусаллаҳ ва дигар сохторҳои ҳарбӣ содиқона хизмат мекунанд ва дар ҳимояи сарҳади давлатӣ низ нақши бузург доранд».

Таъкид гардид, ки дар шароити имрӯза барои будубоши хизматчиёни ҳарбӣ аз ҷониби Ҳукумати Тоҷикистон ва Вазорати мудофиаи мамлакат шароити хуби хизматӣ фароҳам оварда шудааст.

Дар ҷамъомад ба як зумра даъватшавандагон, ки даври омӯзишии ронандагиро хатм намудаанд, дар вазъияти тантанавӣ шаҳодатномаи ронандагӣ супорида шуд.

АКС: Мақомоти иҷроияи ҳокимияти давлатии шаҳри Бӯстон