Шараф Шерализода зарурати таҳкими ҳамкориро дар доираи Созмони умумиҷаҳонии савдо таъкид намуд

ДУШАНБЕ, 23.10.2025 /АМИТ «Ховар»/. 22 октябр бо ташаббуси Созмони умумиҷаҳонии савдо (СУС), Бонки осиёии рушд (ADB) ва бо иштироки намояндагони кишварҳои минтақа ва роҳбарияти созмонҳо дар мавзуи «Ҳамкории иқтисодии минтақавӣ дар Осиёи Марказӣ (CAREC) ва низоми савдои бисёрҷониба: таҳкими ҳамгироӣ дар Осиёи Марказӣ ва берун аз он» Форуми сатҳи баланд баргузор гардид.

Тавре ба АМИТ «Ховар» аз Сафорати Ҷумҳурии Тоҷикистон дар Конфедератсияи Швейтсария хабар доданд, Сафири Фавқулода ва Мухтори Ҷумҳурии Тоҷикистон дар Конфедератсияи Швейтсария, Намояндаи доимии Ҷумҳурии Тоҷикистон дар назди Шуъбаи Созмони Милали Муттаҳид ва дигар ташкилоти байналмилалӣ дар Женева Шараф Шерализода вобаста ба зарурати тақвияти ҳамгироии иқтисодии кишварҳои минтақа ба низоми савдои бисёрҷониба, инчунин таҳкими фаъолият дар чаҳорчӯбаи Созмони умумиҷаҳонии савдо, аз ҷумла раванди узвият ба созмон ислоҳоти сохторӣ, дастовардҳо оид ба содагардонии расмиёти савдо, рушди иқтисоди рақамӣ ва аҳаммияти ислоҳоти низоми савдои бисёрҷониба мавқеи мамлакатро муаррифӣ намуд.

АКС: Сафорати Ҷумҳурии Тоҷикистон дар Конфедератсияи Швейтсария