35-СОЛАГИИ ИСТИҚЛОЛИ ДАВЛАТӢ. Роҳҳои маҳаллӣ ва ҷумҳуриявии шаҳри Турсунзода мумфарш ва бетонпӯш карда шуданд

ТУРСУНЗОДА, 18.11.2024 /АМИТ «Ховар»/.  Бахшида ба 35-солагии Истиқлоли давлатии Ҷумҳурии Тоҷикистон бо дастгирии Мақомоти иҷроияи ҳокимияти давлатии шаҳри Турсунзода ва саҳми соҳибкорону сокинон зиёда аз ду километр роҳи деҳаи Аскаралӣ Мирзоеви Ҷамоати деҳоти ба номи Ҷӯра Раҳмонов мумфарш  карда шуд.  Дар ин хусус ба хабарнигори минтақавии АМИТ «Ховар» Субҳониддини Маҳмуд аз Мақомоти иҷроияи ҳокимияти давлатии шаҳри Турсунзода иттилоъ доданд.

Зимни иштирок дар таъмири роҳ раиси шаҳри Турсунзода Парвиз Акрамзода ба саҳмгузорони ин амали нек  миннатдорӣ изҳор намуда, маслиҳат дод, ки таъмири роҳро бо сифати баланд анҷом диҳанд.

Ёдовар мешавем, ки то имрӯз  дар шаҳри Турсунзода  ба маблағи 34 миллиону 701 сомонӣ 65,3 километр роҳҳои маҳаллию дорои аҳамияти ҷумҳуриявӣ мумфарш ва 30 километр роҳҳои маҳаллӣ бетонпӯш карда шудаанд.  Мумфаршкунии роҳҳои маҳаллӣ дар шаҳри Турсунзода идома дорад.

АКС: Мақомоти иҷроияи ҳокимияти давлатии шаҳри Турсунзода