Ҷашнҳои давлатии Тоҷикистон дар Минск таҷлил гардиданд

ДУШАНБЕ, 15.11.2025 /АМИТ «Ховар»/. 14 ноябр дар Сафорати Ҷумҳурии Тоҷикистон дар Ҷумҳурии Беларус ба муносибати Рӯзи қабули Конститутсияи Ҷумҳурии Тоҷикистон, Рӯзи Президенти Ҷумҳурии Тоҷикистон ва Рӯзи Парчами давлатӣ бо иштироки кормандони намояндагӣ, ҳамватанони муқими Беларус ва донишҷӯёни тоҷик маҷлиси тантанавӣ баргузор гардид. Дар ин хусус ба АМИТ «Ховар» аз Сафорати Ҷумҳурии Тоҷикистон дар Ҷумҳурии Беларус хабар доданд.

Сафири Фавқулода ва Мухтори Ҷумҳурии Тоҷикистон дар Беларус Бахтовар Сафарзода оид ба таърихи қабули Конститутсия дар даврони соҳибистиқлолӣ, аҳамияти он дар рушди давлатдории миллӣ ва нақши калидии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар барқарорсозии сулҳу суботи комил, ваҳдату ҳамбастагӣ ва пешрафти минбаъдаи мамлакат сухан гуфт.

Бахтовар Сафарзода иброз намуд, ки таҷлили Рӯзи Парчами давлатӣ дар қатори дигар санаҳои муқаддаси миллӣ ифодаи ифтихор, худшиносии миллӣ ва эҳтироми мардуми ватандӯсти тоҷик ба арзишҳои давлатӣ мебошад.

АКС: Сафорати Ҷумҳурии Тоҷикистон дар Ҷумҳурии Беларус