Дар Абу Забӣ ҳамкории академияҳои Тоҷикистон ва Амороти Муттаҳидаи Араб баррасӣ гардид

ДУШАНБЕ, 04.11.2025 /АМИТ «Ховар»/. 3 ноябр дар шаҳри Абу Забӣ вохӯрии Сафири  Фавқулода ва Мухтори Ҷумҳурии Тоҷикистон дар Амороти Муттаҳидаи Араб Ашрафҷон Гулов бо роҳбари Академияи Рабдони Амороти Муттаҳидаи Араб Ҷеймс Энтони Морс доир гардид.

Тавре ба АМИТ «Ховар» аз Сафорати Ҷумҳурии Тоҷикистон дар Амороти Муттаҳидаи Араб хабар доданд, дар вохӯрӣ ҷонибҳо аҳаммияти тавсеаи ҳамкорӣ байни  академияҳои ниҳодҳои дахлдори Тоҷикистон ва Аморотро ҷиҳати бозомӯзӣ ва тақвияти малакаҳои касбии кормандони мақомоти ҳифзи ҳуқуқ зурур шумориданд.

Инчунин дар ҷараёнӣ вохӯрӣ доир ба ҷалби шаҳрвандон барои таҳсил дар зинаҳои бакалавр, магистратура ва курсҳои кутоҳмуддати бисёрсоҳавӣ, ташкили чорабиниҳои муштараки илмӣ ва амалӣ мубодилаи афкор намуданд.

 АКС: Сафорати Ҷумҳурии Тоҷикистон дар Амороти Муттаҳидаи Араб