Дурнамои рушди муносибатҳои Тоҷикистону Туркманистон дар соҳаҳои молияю бонк ва сармоягузорӣ баррасӣ гардид

ДУШАНБЕ, 21.11.2025 /АМИТ «Ховар»/. Сафири Фавқулода ва Мухтори Ҷумҳурии Тоҷикистон дар Туркманистон Вафо Ниятбекзода бо раиси Раёсати Бонки давлатии фаъолияти иқтисодии хориҷии кишвари иқомат Раҳимбердӣ Ҷепбаров вохӯрӣ намуд. Дар ин хусус ба АМИТ «Ховар» аз Сафорати Ҷумҳурии Тоҷикистон дар Туркманистон хабар доданд.

Дар вохӯрӣ вазъи кунунӣ ва дурнамои рушди муносибатҳои Тоҷикистону Туркманистон дар соҳаҳои молиявию бонкӣ ва сармоягузорӣ баррасӣ шуда, оид ба роҳҳои боз ҳам тақвият бахшидани ҳамкории мутақобили судманд байни сохторҳои дахлдори ду давлат ибрози андеша карда шуд.

Ба роҳ мондани робитаҳои мустақими доимии корӣ байни ниҳодҳои бонкӣ ва созмонҳои молии Тоҷикистону Туркманистон барои густариши минбаъдаи ҳамкории дуҷониба дар ин замина мувофиқ дониста шуд.

АКС: Сафорати Ҷумҳурии Тоҷикистон дар Туркманистон