Муовини Сарвазири Тоҷикистон Дилрабо Мансурӣ дар Форуми ҳамкории Чин – Осиёи Марказӣ иштирок намуд

ДУШАНБЕ, 11.11.2025 /АМИТ «Ховар»/. Аз 4 то 8 ноябр дар Ҷумҳурии Мардумии Чин Форуми 12-уми ҳамкории Чин – Осиёи Марказӣ баргузор гардид, ки дар он муовини Сарвазири Ҷумҳурии Тоҷикистон  Дилрабо Мансурӣ  иштирок намуд, хабар медиҳад АМИТ «Ховар».

Дар форум Дилрабо Мансурӣ  иброз дошт, ки ҳамкории судманд, махсусан дар бахшҳои тиҷоратию иқтисодӣ ва сармоягузории  минтақавӣ дар қолаби Осиёи Марказӣ ва Чин ба сатҳи баланд расидааст. Ҷумҳурии Тоҷикистон ташаббуси неку созандаи Раиси Ҷумҳурии Мардумии Чин муҳтарам Си Ҷинпин «Як камарбанд, як роҳ»-ро комилан дастгирӣ намуда, дар ин самт якчанд лоиҳаҳои муҳими инфрасохтори минтақавӣ дар соҳаҳои стратегӣ, аз қабили маориф, нақлиёт, энергетика ва саноатро якҷоя ба роҳ мемонад.

Дар идомаи силсилачорабиниҳо муовини Сарвазири Тоҷикистон бо муовини Раиси Шурои машваратии сиёсии мардумии Чин, Раиси Кумитаи Созмони ҳамкории Шанхай оид ба ҳамсоягии нек, дӯстӣ ва ҳамкорӣ хонум Шэн Юэюэ мулоқот намуд.

Шэн Юэюэ аз ташаббусҳои ҷаҳонии Президенти Тоҷикистон муҳтарам Эмомалӣ Раҳмон дар соҳаҳои обу иқлим,  пешгирӣ аз хатари экстремизму террроризм дар минтақа ёдовар шуда, омодагии Чинро барои татбиқи босамари  рушди иқтисоди «сабз», таҳкими амнияти озуқаворӣ, ҳамгироии технологӣ, мактабу маориф, рушди сайёҳӣ ва табодули таҷрибаи кор бо ҷавонон  баён намуд.

АКС аз манбаъҳои боз