Дар доираи лоиҳаи «Рушди бахшҳои молиявӣ ва хусусӣ» ҷаласа баргузор гардид

ДУШАНБЕ, 02.12.2025 /АМИТ «Ховар»/. 1 декабр дар шаҳри Сеули Ҷумҳурии Корея дар доираи лоиҳаи «Рушди бахшҳои молиявӣ ва хусусӣ» байни Ҷумҳурии Тоҷикистон» ва Гурӯҳи Бонки ҷаҳонӣ дар робита ба татбиқи қисми 3-и он – Барномаи рушди таҳвилгарон бо роҳбарияти Агентии пешбурди тиҷорат ва сармоягузорӣ (KOTRA) вохӯрии ҳайати гурӯҳи кории байнидоравӣ баргузор гардид. Дар ин хусус АМИТ «Ховар» бо истинод ба Палатаи савдо ва саноати Ҷумҳурии Тоҷикистон иттилоъ медиҳад.

Дар вохӯрӣ ҷонибҳо доир ба имконияти сармоягузорӣ, имтиёзҳо барои сармоягузорон, вазъи содироту соҳибкорӣ, минтақаҳои озоди иқтисодӣ ва имтиёзҳои он дар Ҷумҳурии Тоҷикистон мубодилаи афкор намуданд.

Муовини якуми Раиси Палатаи савдо ва саноати Ҷумҳурии Тоҷикистон Насимҷон Анваров барои дастрасӣ ба маълумоти зарурӣ доир ба Ҷумҳурии Тоҷикистон ба роҳбарияти Агентии пешбурди тиҷорат ва сармоягузорӣ «Роҳнамои тиҷоратии Тоҷикистон”-ро, ки аз ҷониби Палата дар ҳамкорӣ бо вазорату идораҳо таҳия карда шудааст, пешниҳод намуд.

АКС: Палатаи савдо ва саноати Ҷумҳурии Тоҷикистон