Маросими ҷоизасупорӣ ба ғолибони Озмуни ҷумҳуриявии «Бренди сол – 2025» баргузор гардид

ДУШАНБЕ, 12.12.2025 /АМИТ «Ховар»/. 11 декабр дар шаҳри Душанбе маросими ҷоизасупорӣ ба ғолибони Озмуни ҷумҳуриявии «Бренди сол – 2025» таҳти унвони «Қуллаи Шараф» баргузор гардид. Дар ин хусус ба АМИТ «Ховар» аз Муассисаи давлатии «Маркази миллии патенту иттилоот»-и Вазорати рушди иқтисод ва савдои Тоҷикистон хабар доданд.

Озмун маротибаи панҷум аст, ки дар мамлакат баргузор мегардад. Ба он 116 бренд дар 14 номинатсия ва 65 зерноминатсия пешниҳод карда шуд.

Ҳадаф аз баргузории озмун дар амал татбиқ намудани дастуру ҳидоятҳои Президенти Ҷумҳурии Тоҷикистон муҳтарам Эмомалӣ Раҳмон барои таъмини пайвастаи рушди бахши хусусӣ, ҳавасмандгардонии истеҳсолкунандагони молу хизматрсонии ватанӣ ва ташвиқу тарғиби брендҳои ширкатҳо дар бозорҳои дохилу хориҷи мамлакат ба ҳисоб меравад.

Инчунин мақсади озмун муайян ва муаррифӣ намудани брендҳои муваффақ, боло бурдани обрӯю эътибори брендҳо байни истеъмолкунандагон, ҳавасмандгардонӣ, рушди соҳибкорӣ, рушди истеҳсоли молу маҳсулоти воридотивазкунандаи ватанӣ ва ба содирот нигаронида мебошад.

Озмуни ҷумҳуриявии «Бренди сол – 2025» барои иҷрои «Стратегияи миллии рушди моликияти зеҳнии Ҷумҳурии Тоҷикистон барои давраи то соли 2030» ташкил карда шуд.

Дар озмун корхонаҳои истеҳсолӣ ва хизматрасонӣ, аз қабили Ҷамъияти дорои масъулияти маҳдуди «Акиа Авесто Автоматив Индастри», Ҷамъияти дорои масъулияти маҳдуди «Мармарӣ», Ҷамъияти дорои масъулияти маҳдуди «Акома», Ҷамъияти дорои масъулияти маҳдуди «АМИРӢ», Ҷамъияти дорои масъулияти маҳдуди «Комбинати шири Саодат», Ҷамъияти дорои масъулияти маҳдуди «Афзали Суғд», Ҷамъияти дорои масъулияти маҳдуди «Сити кард», Бонки амонатгузории Ҷумҳурии Тоҷикистон «Амонатбонк», Ҷамъияти саҳомии кушодаи «Бонки Эсхата», Ҷамъияти саҳомии кушодаи «Алиф бонк», Ҷамъияти дорои масъулияти маҳдуди «Сиёма молл» ва ғайра иштирок намуда, сазовори ҷоизаҳо гардиданд.

АКС: Муассисаи давлатии «Маркази миллии патенту иттилоот»