Лоиҳаи «Барномаи давлатии рушди адабиёти бачагона дар Ҷумҳурии Тоҷикистон барои солҳои 2026-2030» таҳия мегардад
ДУШАНБЕ, 03.02.2026. /АМИТ «Ховар»/. Вазорати фарҳанг якҷо бо вазорату идораҳои дахлдор лоиҳаи «Барномаи давлатии рушди адабиёти бачагона дар Ҷумҳурии Тоҷикистон барои солҳои 2026-2030»-ро таҳия ва ба Ҳукумати Ҷумҳурии Тоҷикистон пешниҳод намояд. Чунин дарҷ гардидааст дар Қарори Ҳукумати Ҷумҳурии Тоҷикистон «Дар бораи натиҷаҳои рушди иҷтимоию иқтисодии Ҷумҳурии Тоҷикистон дар соли 2025 ва вазифаҳо барои соли 2026», ки 28 январи соли 2026 ба тавсиб расидааст.
Бояд гуфт, ки адабиёт дар рушду ташаккули ҷаҳонбиниву маънавиёти ҷомеа нақши бузург дорад. Адабиёти бачагона ҷузъи муҳими адабиёт буда, донишу ҷаҳонбинӣ, завқи зебоипарастӣ ва афкори кӯдак маҳз дар натиҷаи мутолиаи асаре, ки мувофиқи завқи ӯст, ба вуҷуд меояд. Пешниҳод кардани асарҳои хубу хонданӣ ба кӯдакону наврасон ба ташаккули зеҳнии онҳо пояи асосӣ мегузорад ва муҳаббаташонро ба хондани китобу илмомӯзӣ бештар мегардонад.
Асарҳои бадеӣ мактаби тарбия ва василаи муассири рушди нутқи кӯдакон мебошанд. Тавассути онҳо кӯдак забонро меомӯзад, фикр мекунад, тасвир менамояд ва ниҳоят ба ифодаи дурусти фикру эҳсосоти худ қодир мегардад. Бисёре аз асарҳои бадеӣ дорои паёмҳои ахлоқӣ ва фарҳангӣ ҳастанд. Арзишҳои маънавӣ- ростгӯӣ, меҳрубонӣ, адолат ва кӯмак ба дигарон дар онҳо бо забони содда ва таъсирбахш баён мегарданд.
Кӯдак на танҳо нутқ, балки мафҳумҳои боарзишро, ки бо забони таъсирбахш ифода шудаанд, меомӯзад. Масалан, мефаҳмад, ки ростгӯӣ, меҳрубонӣ ва ёрӣ додан ба дигарон амалҳои неканд ва ин амалҳо дар нутқи ӯ ҳамчуни ифодаҳои ибратбахш ҷой мегиранд.
Ёдовар мешавем, ки солҳои охир дар ҷумҳурӣ китобҳои кӯдакона бо забони ноби тоҷикӣ бениҳоят хуб ва бо ороиши ҳозиразамон, диққатҷалбкунанда ва хонданибоб ба нашр мерасанд. Хушбахтона, имрӯзҳо теъдоди ин гуна китобҳо афзудааст. Дар баробари ин, тарҷумаи китобҳои кӯдаконаи дигар миллатҳо низ бо забони тоҷикӣ ба роҳ монда шуда, дастраси хонандагони хурдсол гардидааст. Бо вуҷуди ин, дар ин соҳа камбудиву норасоиҳои зиёд ба мушоҳида мерасанд.
Ҳадафи таҳияи лоиҳаи «Барномаи давлатии рушди адабиёти бачагона дар Ҷумҳурии Тоҷикистон барои солҳои 2026-2030» бартараф намудани камбудиҳои ҷойдошта ва рушди адабиёти бачагона дар мамлакат мебошад.
Рухсораи НУР,
АМИТ «Ховар»
АКС аз манбаъҳои боз
Дар Тоҷикистон «Барномаи рушди китобхонаҳои деҳот барои солҳои 2027–2031» амалӣ мешавад
Дар Осорхонаи миллӣ бахшида ба Даҳсолаи байналмилалӣ оид ба таҳкими сулҳ барои наслҳои оянда ҳамоиш баргузор гардид
Дар Театри таҷрибавии тамошобини ҷавон намоишномаи «Бобоҷон Ғафуров» нахустин маротиба пешниҳод гардид
Намояндаи Тоҷикистон дар Фестивал-озмуни байналмилалии «Viva Astana» сазовори «Шоҳҷоиза» гардид
Аз 9 то 30 июн экспедитсияи муштараки бостоншиносии Тоҷикистон ва Фаронса гузаронида шуд
Адрасбоф Гулбону Наврӯзова: «Ҳадафи мо эҳёи ҳунарҳои миллӣ ва бо ҷойи кор таъмин намудани занону духтарон аст»
ПАЙВАНДИ ИНСОН БО ТАБИАТ ДАР «ШОҲНОМА»-И ФИРДАВСӢ. Мулоҳизаҳои Академик Фарҳод Раҳимӣ дар ин мавзуъ
Акбар Эронӣ: «Ибтикори Президенти Тоҷикистон оид ба таъсиси Ҷоизаи байналмилалии Ибни Сино иқдоми мондагор ва ояндасоз аст»
Туҳфаи Пешвои миллат — маҷмуи тӯбҳои расмии ҷомҳои ҷаҳонии FIFA ба Осорхонаи миллии Тоҷикистон тақдим гардид
БЕҲТАРИН КИТОБХОН. Таҳти ин унвон озмуни ҷумҳуриявӣ баргузор мегардад
Иштирокчиёни Форуми XI байналмилалии «Кӯдакони Иттиҳод» Қалъаи бостонии Ҳисорро тамошо намуданд
ШОМИ ВАҲДАТУ ҲАМДИЛӢ. Дар Осорхона-мамнуъгоҳи ҷумҳуриявии Данғара ҳамоиши сиёсӣ-фарҳангӣ баргузор шуд
