ТАЪМИНИ БОЗОРИ ДОХИЛӢ БО МАҲСУЛОТИ ҶАНГАЛ. Дар Суғд дар 540 метри мураббаъ гармхона бунёд гардид

ДУШАНБЕ, 29.03.2026. /АМИТ «Ховар»/. Бо мақсади нигоҳдории гуногунии биологӣ, барқароркунӣ, зиёд намудани масоҳату маҳсулоти ҷангал, таъмини бозори дохилӣ бо маҳсулоти ҷангал ва содироти он ба хориҷи мамлакат  дар вилояти Суғд гармхонаҳо ва коргоҳи коркарди хуч таъсис дода шудаанд, ки фаъолияти босамар доранд. Дар ин хусус АМИТ «Ховар» бо истинод ба Агентии хоҷагии ҷангали назди Ҳукумати Ҷумҳурии Тоҷикистон хабар медиҳад.

Гармхонаҳо дар 540 метри мураббаъ бунёд гардида, дар онҳо беш аз 50 ҳазор бех ниҳоли дарахтони ҷангалӣ ва ороишӣ парвариш меёбанд. Ин иқдом ба рушди соҳаи ҷангалпарварӣ ва таъмини ниҳолҳои зарурӣ барои минтақаҳои гуногуни мамлакат мусоидат менамояд.

Инчунин коргоҳи истеҳсоли нӯшобаҳои табиӣ аз хуч, зирк ва зардолу фаъолият дорад, ки истеҳсоли чунин маҳсулоти табиӣ метавонад ба рушди истеҳсолоти ватанӣ ва истифодаи самараноки захираҳои табиӣ мусоидат намояд.

Ёдовар мешавем, ки ҷангал ба таъмини захира ва бехатарии ғизо таъсири калон мерасонад. Муассисаҳои давлатии хоҷагиҳои ҷангал ва аҳолӣ аз ҷангалҳои мамлакат ҳар сол писта, хуч, ангат, чормағз, бодом, зира ва дигар маҳсулот ҷамъоварӣ менамоянд. Аз он ҳам аҳолии маҳаллӣ ва ҳам муассисаҳои давлатии хоҷагиҳои ҷангал фоида мебинанд.

Маҳсулоти ҷангал аз ҷиҳати экологӣ хеле тоза, хуштаъм ва дорои витаминҳои зиёди барои организм зарурӣ мебошад.

АКС аз бойгонӣ