Дар Нуробод ҷашни Наврӯз бо барномаҳои фарҳангӣ, варзишӣ ва ободкориҳо таҷлил карда шуд

ДУШАНБЕ, 13.04.2026. /АМИТ «Ховар»/. Дар ноҳияи Нуробод Ҷашни байналмилалии Наврӯз бо шукуҳу шаҳомати хос ва руҳияи баланди идона таҷлил гардид.

Тавре ба АМИТ «Ховар» аз Мақомоти иҷроияи ҳокимияти давлатии ноҳияи Нуробод хабар доданд, дар доираи тантанаҳои наврӯзӣ дар саҳни ҷашнгоҳ намоиши васеи дастовардҳо, ҳунарҳои мардумӣ, анвои таомҳои миллӣ, инчунин дастархонҳои рамзии «ҳафт син» ва «ҳафт шин» ташкил карда шуд.

Инчунин ҳунарҳои мардумӣ, аз қабили зардӯзӣ, гулдӯзӣ, чакандӯзӣ, атласу адрасбофӣ, тоқидӯзӣ ва дигар навъҳои ҳунарҳои суннатӣ ба таври шоиста муаррифӣ гардиданд. Кадбонуҳои ноҳия низ навъҳои гуногуни маҳсулоти нонию қаннодӣ, аз ҷумла кулча, фатир, қалама ва чаппотиро омода ва пешкаши меҳмонон намуданд.

Иброз гардид, ки Наврӯз ҳамчун ҷашни эҳёи табиат, рамзи дӯстию ҳамдигарфаҳмӣ ва пайванди наслҳо мақоми хос дорад. Ин ҷашн аз куҳантарин ойинҳои миллӣ буда, мардуми тоҷик онро давоми ҳазорсолаҳо ҳамчун мероси гаронбаҳои маънавӣ ҳифз намудаанд.

Ҷавҳари аслии Наврӯз инсонҳоро ба сулҳу дӯстӣ, созандагию накӯкорӣ, эҳтироми табиат ва қадршиносии арзишҳои миллӣ раҳнамун месозад.

Дар доираи тантанаҳои ҷашни Наврӯз дар ноҳия мусобиқаи байналмилалии гӯштингирӣ баргузор гардид. Дар он паҳлавонон аз тамоми минтақаҳои ҷумҳурӣ ва хориҷи кишвар иштирок намуда, маҳорати баланди варзишӣ нишон доданд.

Баргузории чунин мусобиқаҳо ба таҳкими дӯстии халқҳо, тарғиби тарзи ҳаёти солим ва эҳёи анъанаҳои миллӣ мусоидат менамояд.

Инчунин дар доираи тадбирҳои ободонӣ бахшида ба ҷашни Наврӯз дар шаҳраки Дарбанди ноҳияи Нуробод ду маркази нави савдою хизматрасонӣ ба истифода дода шуд.

Иттилоъ дода шуд, ки иншоот аз ду ошёна иборат буда, бо тарҳи муосир ва ҷавобгӯ ба талаботи замон бунёд карда шудааст.

Дар марказ барои омода ва пешниҳод намудани навъҳои гуногуни хӯрок шароити мусоид муҳайё карда шуда, беш аз 4 сокини маҳаллӣ бо ҷойи кори доимӣ таъмин гардид.

Ҳамчунин маркази савдои либосворӣ мавриди истифда қарор дода шуд. Дар марказ шароити зарурӣ таъмин буда, дар он беш аз 6 нафар бо ҷойи кори доимӣ таъмин гардид. Ба истифода додани ин иншоот барои беҳтар намудани хизматрасонии савдо ва қонеъ гардонидани талаботи сокинон аҳамияти муҳим дорад.

Ифтитоҳи ду маркази хизматрасонӣ туҳфаи арзанда ба ҷашни Наврӯз буда, дар самти ободонӣ ва рушди ноҳияи Нуробод қадами устувор маҳсуб мешавад.

АКС: Мақомоти иҷроияи ҳокимияти давлатии ноҳияи Нуробод