ИСТИФОДАИ САМАРАНОКИ ЗАМИН. Сокини нoҳияи Вахш дар замини наздиҳавлигияш гармхона ташкил намуд

ДУШАНБЕ, 04.04.2026 /АМИТ «Ховар»/. Сокини деҳаи Гулзамини Ҷамоати шаҳраки Зарнисори ноҳияи Вахш Маҳмадисҳоқ Махмадраҳимов дар 15 садяк замини наздиҳавлигияш гармхона ташкил намудааст, ки дар он бештар помидор ва бодиринг парвариш менамояд, иттилоъ медиҳад хабарнигори АМИТ «Ховар».

Маҳмадисҳоқ Маҳмадраҳимов иброз намуд, ки аз ин гармхонаҳо давоми сол 3 маротиба ҳосили дилхоҳ ҷамъоварӣ менамоянд. «Коркарди  агротехникӣ, сари вақт додани нуриҳои минералӣ ва нигоҳубини хуби зироат имкон медиҳад, ки ҳосили баланду дилхоҳ ба даст оварда шавад. Рӯзҳои наздик ҳосили помидор низ ҷамъоварӣ ва пешниҳоди бозори истеъмолӣ гардонида мешавад»,-афзуд ҳамсуҳбати мо.

Дар замини наздиҳавлигӣ бунёд кардани гармхонаҳо манфиатовар аст. Онҳо шароит фароҳам меоранд, ки талаботи харидорон дар чор фасли сол бо маҳсулоти истеҳсоли худӣ қонеъ гардонида шавад.

Иттилоъ дода шуд, ки Маҳмадисҳоқ Маҳмадраҳимов аз соли 2012 Хоҷагии деҳқони «Исҳоқ»-ро  таъсис додааст, ки дорои 27 садяк замин мебошад.  Дар замини  хоҷагӣ пиёз, картошка, гулкарам ва дигар навъи сабзавот кишт карда шудаст. Дар айни замон гулкарам ҷамъоварӣ ва ба бозор пешниҳод мегардад.

Аҳли хонавода дар заминҳояшон заҳмат кашида, дар таъмини бозорҳои истеъмолии мамлакат бо маҳсулоти босифати кишоварзӣ саҳм мегузоранд.

Дар ин баробар аз маҳсулоти гуногуни кишоварзӣ барои фасли зимистон захира омода  намуда, амнияти озуқавории хонаводаашонро таъмин месозанд.

АКС: АМИТ «Ховар»