Ҳамкории иқтисодию тиҷоратии Тоҷикистону Арабистони Саудӣ баррасӣ гардид

ДУШАНБЕ, 16.06.2026 /АМИТ «Ховар»/. 15 июн дар шаҳри Душанбе Раиси Палатаи савдо ва саноати Ҷумҳурии Тоҷикистон Фарҳодшоҳ Раҳмонализода бо Раиси Шурои мудирони ширкати «Enjaz Human Resources», ҳамраиси қисми саудии Шурои муштараки кории Тоҷикистону Арабистони Саудӣ Муҳаммад бин Солеҳ Ал-Сувайҳ вохӯрӣ намуд.

Тавре аз Палатаи савдо ва саноати Ҷумҳурии Тоҷикистон ба АМИТ «Ховар» иттилоъ доданд, дар вохӯрӣ ҷонибҳо доир ба сармоягузорӣ дар соҳаҳои гидроэнергетика, минтақаҳои озоди иқтисодӣ, коркарди маҳсулоти кишоварзӣ, саноати кӯҳкорӣ ва рушди соҳаи сайёҳӣ мубодилаи афкор намуданд.

Ҳамсуҳбатон вазъи ҳамкории иқтисодию тиҷоратии ду давлатро мавриди баррасӣ қарор дода, таъкид намуданд, ки ҳаҷми гардиши кунунии савдо байни Тоҷикистон ва Арабистони Саудӣ дар сатҳи ибтидоӣ қарор дорад.

Изҳор гардид, ки бо назардошти заминаҳои мусоиди сиёсӣ ва иродаи роҳбарони олии ду давлат, иқтидори бузурги истифоданашудаи иқтисодӣ мавҷуд аст, ки метавонад ҳаҷми тиҷорати дуҷонибаро ба куллӣ афзоиш диҳад.

Дар мулоқот иброз гардид, ки таъсиси Шурои муштараки корӣ ва баргузории ҷаласаҳои он заминаи мусоидро барои эҷоди пули мустақими тиҷоратӣ фароҳам сохтааст.

Муҳаммад бин Солеҳ Ал-Сувайҳ омодагии тиҷоратии Арабистони Саудиро барои таҳкими ҳамкорӣ ва сармоягузории мустақим ба лоиҳаҳои Тоҷикистон изҳор дошт.

Ҷонибҳо ба мувофиқа расиданд, ки ҷаласаи навбатиро дар ҳошияи яке аз намоишгоҳҳои байналмилалии Тоҷикистон, ки баргузории онҳо дар соли 2026 ба нақша гирифта шудааст, доир намоянд.

АКС: Палатаи савдо ва саноати Ҷумҳурии Тоҷикистон