Дар Сеул байни вазоратҳои саноати Тоҷикистон ва Ҷумҳурии Корея Ёддошти тафоҳум ба имзо расонида шуд

ДУШАНБЕ, 15.09.206 /АМИТ «Ховар»/. Дар доираи ҷаласаи нахустини Механизми машваратии вазирони саноат дар формати «C5+1» дар Сеул байни вазоратҳои соҳавии Ҷумҳурии Тоҷикистон ва Ҷумҳурии Корея Ёддошти тафоҳум ба имзо расонида шуд, иттилоъ медиҳад АМИТ «Ховар» бо истинод ба Вазорати саноат ва технологияҳои нави Ҷумҳурии Тоҷикистон.

Санади мазкур рушди лоиҳаҳои муштаракро дар соҳаҳои саноати сабук, нассоҷӣ, кӯҳӣ, кимиё, мошинсозӣ, инчунин зеҳни сунъӣ ва технологияҳои нав пешбинӣ менамояд. Ҳуҷҷат ба табодули таҷриба, татбиқи технологияҳои инноватсионӣ, таъсиси корхонаҳои муштарак ва таҳкими робитаҳои мустақим байни корхонаҳои саноатии ду кишвар равона шудааст.

Инчунин дар мулоқоти Вазири саноат ва технологияҳои нави Ҷумҳурии Тоҷикистон Шералӣ Кабир бо Вазири савдо, саноат ва захираҳои Ҷумҳурии Корея Ким Ҷонг Кван ҳамкории дуҷониба дар соҳаҳои саноати маъдан, иқтисод, сармоягузорӣ, рушди саноат, истифодаи технологияҳои нав дар раванди истеҳсолот ва истихроҷи маъданҳо баррасӣ шуданд.

Ҳамзамон аз рӯи натиҷаҳои нахустин ҷаласаи Механизми машваратии вазирони саноат дар қолаби «C5+1» намояндагони ҷумҳуриҳои Корея, Тоҷикистон, Қазоқистон, Қирғизистон, Туркманистон ва Узбекистон Ёддошти тафоҳум оид ба ҳамкорӣ дар соҳаи саноат ва занҷираҳои таъминотро ба имзо расониданд, аз ҷумла рушди инфрасохтори саноатӣ, тавсеаи тиҷорат ва сармоягузорӣ, ҳамкорӣ дар соҳаи маъданҳои муҳим, ҷорӣ намудани технологияҳои истеҳсолоти ҳушманд ва зеҳни сунъӣ, инчунин омода намудани кадрҳои техникӣ ва муҳандисиро пешбинӣ менамояд.

Ҳамчунин дар анҷоми мулоқот Шералӣ Кабир Вазири савдо, саноат ва захираҳои Ҷумҳурии Кореяро барои иштирок дар сеюмин Форуми байналмилалии саноати маъданҳои куҳӣ-металлургии Тоҷикистон, ки моҳи ноябр дар шаҳри Душанбе баргузор мегардад, даъват намуд.

АКС:Вазорати саноат ва технологияҳои нави Ҷумҳурии Тоҷикистон